بەرهەمێ گەنمی ل دهۆكێ سێ قات ژ سالا بۆری زێدەتر لێهاتیە
دهۆك، لەزگین جوقی:
رێڤەبەرێ گشتی یێ چاندنێ ل پارێزگەها دهۆكێ دیار كر، ئەڤ سالە بەرهەمێ گەنمی ل دهۆكێ سێ قات ژ سالێن بۆری زێدەتربوویە و دبێژیت: پیشبینی دهێـتە كرن ئەڤ سالە 382 هزار تەنێن گەنمی ل دهۆكێ بهێنە بەرهەمئینان.
ئەحمەد جەمیل، رێڤەبەرێ گشتی یێ چاندنێ ل پارێزگەها دهۆكێ بۆ رۆژناما ئەڤرۆ خویا كر، هەموو بەرهەڤی بۆ وەرگرتنا گەنمێ جۆتیاران ل پارێزگەها دهۆكێ یێن هاتینە كرن و گۆت: «بڕیارە ل رۆژا 25/5/2023ێ دەست ب وەرزێ دوورینا گەنمی ل دهۆكێ بهێـتە كرن، ئەم پێشبینی دكەین، ئەڤ سالە بەرهەمێ گەنمی بگەهیتە 382 هزار تەنان، ئەڤە ژی رێژەكا گەلەك باشە بەرامبەر سالێن بۆری و سێ قات زێدەبوویە».
ناڤهاتی ئاشكرا ژی كر كو ئەڤ سالە هەموو گەنمێ جۆتیاران ژ جۆتیاران دێ هێتە وەرگرتن و بۆ هەر تەنەكا گەنمی ژی 850 هزار دینار هاتینە دانان و گۆت: «ل سایلۆیان بەرهەڤی هاتینە كرن، گەنمێ جۆتیاران بهێتە وەرگرتن و هەموو ئاسانكاری و پشتەڤانی ژی بۆ جۆتیاران یێن هاتینە كرن بۆ وەرگرتنا گەنمی ل سایلۆیان».
