بەرهەمێ هێك و مریشكان دێ بۆ بازاڕێن جیهانێ هێتە هنارتن
هەولێر، قائید میرۆ
پەیڤدارێ وەزارەتا چاندنێ ئاماژەكر، بەرهەمئینانا هێك و گوشتێ سپی گەهشتیە ئاستەكی زۆر كو زێدەترە ل پێدڤیێن بازاڕێ ناڤخۆ. هەروەسا دبێژیت: ئەڤ سالە دێ هێك و مریشكێن كوردستانێ بۆ بازاڕێن جیهانێ بهێنە هنارتن و د دەمێ نوكە دا نیڤا بەرهەمێ ناڤخۆ یێ بەر ب بازاڕێن باشوور و ناڤەڕاستا ئیراقێ دچیت.
هیوا عەلی، پەیڤدارێ وەزارەتا چاندنێ بۆ رۆژناما ئەڤرۆ دیار كر «نوكە ل هەرێما ئێك هزار و 132 پڕۆژێن بەرهەمئینانا هێكان ل هەرێما كوردستانێ هەنە و ئەگەر هەموو ئەو پڕۆژە ب تەمامی كار بكەن شیاندایە سالان سێ ملیار هێكا بەرهەم بینن، بازاڕێن نافخۆیا هەرێما كوردستانێ رۆژانە پێدڤی ب حەفت هزار كارتنێن هێكان هەیە بۆ وەلاتیان، بەلێ رۆژانە بەرهەمێ هێكان ل هەرێمێ دگەهیتە 14 هزار كارتونان، واتە نیڤا بەرهەمێ هێكێن نافخۆ یێ زێدەیە ئەڤەژەی رێژەیەكا زۆرە و نیڤا بەرهەمێ مە یێ زێدەیە، زێدەبوونا بەرهەمێ هێكا جهێ كەیفخۆشیا مەیە وەكی حوكمەت، چونكە ئەم دێ بازاڕێن خوە ب بەرهەمێ نافخۆ تژی كەین و د هەمان دەمدا بۆ بازاڕێن جیهانێ و دەڤەرێن دی یێن عێراقێ بهێنە هنارتن، هەموو هاریكاریەك بۆ جووتیاران دێ هەبیت ژ پێخەمەت زێدەكرنا بەرهەمێ نافخۆ، ئەڤرۆ ئەم یێن گەهشتینە قۆناغەكێ بەرهەمێ هێك و مریشكا زۆر زێدەترە ژ پێدڤیێن نافخۆ.
ل دۆر گوشتێ سپی هیوا عەلی گۆت» مە وەك هەرێما كوردستانێ سالانە پێدڤی ب 147 هزار تەنێن گوشتێ مریشكایە، بەلێ سالانە 285 هزار تەن گوشتێ سپی ل پڕۆژێن هەرێما كوردستانێ دهێتە بەرهەمئینان و 135 هزار تەنێن زێدەی بازاڕی مە هەنە، ب رێژەیا 45% ێ بەرهەمێ گوشتێ مریشكێن هەرێمێ دهێتە هنارتن بۆ بازاڕێن ناڤەڕاست و باشوورێ عێراقێ، بەرهەم ئینانا گوشتێ سپی زۆر زێدە كریە ل ڤان سالێن دووماهیێ و ل هەرێما كوردستانێ ئێك هزار و 535 پڕۆژە هەنە ئەڤەژی هژمارەكا زۆرە و سال بۆ ساڵی ژی بەرهەمێ هێك و مریشكان یێ بەرەف زێدەبوونێ دچیت، لەوڕا حوكمەتا هەرێما كوردستانێ ب رێیا وەزارەتا چاندنێ یا كار دكەت بۆ ڤێ چەندێ بەرهەمێ هێك و مریشكێن كوردستانێ بهێتە هنارتن بۆ هەموو دەڤەرێن عێراقێ و بازاڕێن جیهانێ ژی، ل گۆەری پلانا نوكە كار ل سەر دهێتەكرن ئەڤ سالە دێ هێك و مریشك بۆ وەلاتێن كەنداڤی بهێنە هنارتن و هەموو بزاڤەك دهێتەكرن بازاڕ بۆ بەرهەمێ نافخۆ بهێتە پەیداكرن.
