بەرهەمێ پیڤازێن ئاكرێ دگەهیتە شەش هزار تەنان
ئەڤرۆ، رەمەزان زەكەریا
ل دەڤەرا ئاكرێ سالانە چەندین جۆرێن بەرهەمێن خوارنێ دهێنە چاندن كو ل ناڤ بازاری خواست لسەر هەیە، ڤان سالێن دووماهیێ رێژەكا باش پیڤازا دهێنە چاندن و سالانە ئەڤ رێژە زێدە دبیت، دەمێ بۆری كیلۆیا پیڤازا بهایێ وێ گەلەك بلند ببوو نوكە بهایێ وێ هاتیە خوارێ رێژەكا باش بەرهەمێ نافخۆیی كەفتیە بازاری.
كاروان جەمال، ئەندازیار ل رێڤەبەریا چاندنا ئاكرێ بۆ ئەڤرۆ گۆت: بەرهەمێ پیڤازا ل ئاكرێ سالانە پتر دهێتە چاندن، ژ بەر كو بەرهەمەكێ باشە و خواستەكا باش لسەر هەیە بەرهەمەكێ سەرەكییێ رۆژانەیە، لەورا ژی جوتیارێن دەڤەرێ گرنگیەكا باش دایە بەرهەمێ پیڤازا باشترین جۆرێ پیڤازێ ل دەڤەرا ئاكرێ سالانە دهێتە بەرهەمئینان.
ناڤبری گۆت ژی: ئەڤ سالە بەرهەمێ پیڤازا زڤستانێ ل سەر رووبەرێ 1500 دونەما هاتبوو چاندن بەرهەمێ وێ سێ هزار تەن بوون، پیڤازا دەڤەرێ ئێكە ژ بەرهەمێن باش و خواستەكا زۆر ل سەر هەیە.
ناڤهاتی ئاشكراكر: بەرهەمێ پیڤازا بهاری رووبەرێ 750 دونەمان هاتبوو چاندن بەرهەم ژی سێ هزار تەن بوون، جوتیارێن دەڤەرا ئاكرێ هەموو جۆرە بەرهەكێ دچینن ئاخ و ئاڤا ئاكرێ گەلەك یا گونجایە بۆ كەرتێ چاندنێ تایبەت ڤان جۆرە بەرهەمان.
خویاكر: دخوازین جوتیار بەردەوامیێ بدەنە چاندنا بەرهەمێن خۆمالی، ژ بەر كو ئەڤ بەرهەمێ خومالی خواستەكا زێدەتر ل سەر هەیە، وەلاتی ژی دخوازن بەرهەمێ خۆمالی بخۆن، لەورا كرین و فرۆتن ژبلی دەرڤەی ئاكرێ ل نافخۆ ژی دا وەلاتی پتر بەرهەمێ نافخۆیی دكرن.
