بەرهەڤین پشتی هەلبژارتنان ل گەل ئاکپارتیێ دانوستاندنان بکەین
بەرپرسەکا پارتا دەم و بەربژارا وێ پارتیێ بۆ سەرۆکاتیا باژێرڤانیا ئستەنبولێ دیار کر نها هەموو ئالیێن سیاسی ل تورکیا خوە بۆ هەلبژارتنێن باژێرڤانیان بەرهەڤ دکەن، وان ژی وەکو پارتا دەم دڤێت پشتی هەلبژارتنان ل گەل ئاکپارتیێ دەست ب دانوستاندنان بکەن و بێگومان دێ بابەتێ سەرەکی ژی چاوانیا چارەسەرکرنا پرسا کوردی بیت.
مەرال دانیش بەشتاش بەربژارا پارتا دەم بۆ سەرۆکاتیا باژێرڤانیا ئستەنبولێ دیار کر، نها تورکیا بەر ب هەلبژارتنێن باژێرڤانیا ڤە دچیت و هەموو هێزێن سیاسی ژی یێ کار دکەن دا بشێن پشتەڤانیا خەلکی بدەستڤە بینن، وەکو پارتا دەم وان ژی ل هەموو دەڤەرێن تورکیا دەست ب بزاڤەکا مەزن کرینە و بەربژارێن خوە ژی هەنە، چونکی وان ژی دڤێت وەکو پارتەکا هەری کاریگەر ل تورکیا رێژەیا دەنگێن خوە زێدە بکەن و گۆت: (د هەلبژارتنێن بۆری یێن تورکیا دا مە پشتەڤانیا کەمال کلچدار ئۆغلۆیی کر، ئارمانجا مە ئەو بوو دا دووماهیێ ب دەستهەلاتا نها یا ئەردۆغانی بینین، لێ مخابن کەمال کلچدار ئۆغلۆ نەشیا پشتەڤانیا خەلکی و دەنگێن وەلاتیان دەرکەڤیت، چونکی ئاشکرا بوو ل پشت پەردەیان دا کلچدار ئۆغلۆیی چەندین رێککەفتنێن نهێنی ل گەل هندەک ئالیێن دی هەبووینە و دەمێ هندەک تشت ئاشکرا بوون، بێگومان رێژەیا دەنگێن کلچدار ئۆغلۆیی ژی کێم بوون).
ناڤهاتیێ ئەو یەک ژی دیار کر، وان دڤێت د هەلبژارتنێن ڤێجارێ دا سیاسەتا خوە بگوهۆڕن، چونکی پتر ژ ٩٠٪ یێن دەنگێ خوە ددەنە پارتا وان کوردن، ژ بەر ڤێ یەکێ ژی وان نەڤێت شاشیێن بەری نها دوبارە بکەن و دێ د ڤان هەلبژارتنان دا ل سەر بنەمایێ بدەستڤەئینانا رێژەیەکا هەری زێدە یا دەنگێن کوردان کار کەن، ژ بەر ڤێ یەکێ ژی ئەو وەکو جارێن بۆری نەچار نینن ل باژێرێن هەری مەزن یێن تورکیا پشتەڤانیێ ل بەربژارێن پارتەکا دی بکەن، بەلکو وان دێ بەربژارێن خوە هەبن.
بەربژارا پارتا دەم بۆ سەرۆکاتیا باژێرڤانیا ئستەنبولێ ئەو یەک ژی دیار کر، ئەو چاڤەرێنە پشتی هەلبژارتنان هندەک گوهۆڕین ل تورکیا روو بدەن، وەکو پارتا دەم وان دڤێت پشتی هەلبژارتنان ل گەل ئاکپارتیێ دەست ب قۆناغەکا نوو بکەن و گۆت: (مە دڤێت پشتی هەلبژارتنان ل گەل ئاکپارتیێ دەست ب دانوستاندنان بکەین، هەکە ئاکپارتی ژی یا بەرهەڤ بیت ئەم دشێین پێکڤە تورکیا بەر ب قۆناغەکا نوو ڤە ببەین، بۆ مە وەکو پارتا دەم گەلەک یا گرنگە دەست ب قۆناغەکا نوو یا ئاشتیێ و چارەسەرکرنا پرسا کوردی ل تورکیا بهێتە کرن، چونکی هەتا پرسا کوردی نەهێتە چارەسەرکرن دێ رەوشا نها یا ئالۆز ل تورکیا هەر یا بەردەوام بیت).
ناڤهاتیێ د دووماهیا ئاخڤتنا خوە دا ئەو یەک ژی دیار کر، وان چو رێککەفتنێن نهێنی ل گەل ئاکپارتیێ نینن، بەلکو وەکو پارتا دەم وان ژی دڤێت رێژەیەکا باش یا دەنگان بدەستڤە بینن و پێگەهێ خوە ل تورکیا بهێزتر لێ بکەن، چونکی دەمێ پێگەهێ وان بهێز بیت ئەو دشێن ژ بۆ چارەسەرکرنا پرسا کوردی ل گەل دەستهەلاتێ دەست ب دانوستاندنان بکەن.
