بەرهەڤیێن ئافرەتێن دهۆكێ گەهشتینە كۆپیتكێ و گەشبینن هەڤڕكییا ناسناڤی بكەن
چاڤەڕێ دهێتە كرن ل چارشەمبییا بهێت هەڤڕكیێن قارەمانیا كوردستانێ یا فوتسالا كچان ل سەر ئاستێ تازەپێگەهشتیان ل هەولێرا پایتەخت ب پشكدارییا حەفت یانە و فێرگەهەك ل هەولێرا پایتەخت بهێتە ئەنجامدانا و تیما یانەیا ئافرەتێن دهۆكێ وەكو نوونەرا پارێزگەهێ دێ ب هیڤیێن مەزن و ئارمانجێن هەڤڕكییان پشكدار بیت.
ل دۆر ڤێ یەكێ جریسك یونس سەرۆكا یانەیا ئافرەتێن دهۆكێ بۆ رۆژنامەیا ئەڤرۆ گۆت: پشتی بۆ زێدەتری هەیڤەكێ یە كادرێ راهێنانێ بەردەوام دۆڤچوونا ئەو یاریزانێن هاتینە دناڤ رێزێن تیمێ دا كرین ژ سەرجەمێ 60 یاریزانێن كو ژ دایكبوویێن دناڤبەرا 2005هەتا 2013ێ ئەوێن د پرۆژەیێ دانانا شەنگستەكێ ئەكادیمی دا 13 یاریزان بۆ لیستەیا دووماهیێ یا قارەمانیێ هاتنە دەستنیشانكرن، د ماوەیێ دو حەفتیێن بۆری دا كار ل سەر دانانا پلان و تەكتیكا یاریزانان هاتە كرن و خوەجهكرنا وان دناڤ یاریگەهێ دا ژبەركو هەمی یاریزان د ژییەكێ بچووك دا نە و پشتی وێ چەند یاریێن هەڤالینی ژی ئەنجامداینە پێخەمەت باشترین بەرهەڤی .
ژلایەكێ دووڤە ناڤهاتی ئەوچەندە ژی دیار كر پشكدارییا تیما وان نە بتنێ بۆ هژمارەیە بەلكو كار هاتیە كرن و هیڤیێن وان هەڤڕكییە و ئارمانج ژی بۆ دەستڤە ئینانا رێزیێن ئێكێ یە و باوەری ب كادرێ راهێنانێ و یاریزانێن خوە هەیە و ژلایێ پشتەڤانیێ و دارایی ڤە ژی گۆت: ب سۆپاس ڤە پارێزگارێ دهۆكێ د. عەلی تەتەر ب سنگەكێ بەرفرەهـ بەرهەڤییا خوە دیاركرییە بۆ پشتەڤانیێ و یێ هاریكارە بۆ دابینكرنا ئەوا پێدڤی ل دووڤ شیانێن وان، ئەم گەشبینین دێ پشكدارییا مە یا سەرفەراز بیت، پێنەڤێت مە كارەكێ باش ژی كرییە و ئارمانجا مە ڤەگەڕاندنا فوتسالا ئافرەتێن دهۆكێ یە وەكو دەستپێك ژ تازەپێگەهشتییان و دێ بەردەوامبین ژبۆ پێشئێخستنا وەرزشا ئافرەتان.
بۆ زانین بڕیارە ل 23ێ ڤێ مەهێ پشككێشان بهێتە كرن و قارەمانی ژ 24هەتا29ێ شێوەیێ كۆمڤەبوون ل هەولێرا پایتەخت بهێتە كرن، هەشت یانە و فێرگەهـ دێ هێنە بەلاڤكرن ل سەر دو كۆمان، ئەو ژی، ئافرەتێن دهۆك، تلسقۆف، شارەزوور، چەمچەمال، دۆكان، هەلەبجە، رەواندۆز و فێرگەها عەباس.تیمێن رێزێن ئێكێ و دویێ دێ دەربازبنە چارگۆشەیا زێرین، خودانێن رێزیێن ئێكێ یێن هەر كۆمەكێ دێ بەرانبەر یا خودانێن رێزێن دویێ یێن كۆمێن دی كەن و سەركەفتیێن هەردو یارییان دەربازبنە یارییا دووماهیێ.
