بەرهەڤیێن باش و رۆلێ سەرۆكێ حوكمەتێ ئەگەرێن مێڤانداریا قارەمانیا جیهانێ بوون
ئەڤرۆ
د داخویانیەكێ دا ئەندامێ ئێكەتیا تەپا پێی یا هەرێما كوردستانێ بۆ رۆژناما ئەڤرۆ دیار كر پشتی سەرەدانا شاندەكێ ئێكەتیا تەپا پێی یا هەرێمان كۆنیفایێ بۆ كوردستانێ ژبۆ دووڤچوونا بادەكا مێڤانداریا قارەمانیا جیهانی 2024ێ ب فەرمی رازیبوون ل سەر هاتە دان هەرێما كوردستانێ قارەمانیێ مێڤان بكەت.
زێدەتر ئازاد محەمەد گۆت: شاندێ ئێكەتیا تەپا پێی یا هەرێمێن جیهانی ب سەرپەرشتیا سەرۆكێ ئێكەتیا كۆنیفایێ یێ سویدی پێر ئەندرێس بیلند و هەردو جێگرێن وی یێ هنگاری كریستۆف ڤێنیزێل و یێ رۆسیایێ دیمێتری پاگاڤا ل دەستپێكا ئادارا بوری سەرەدانا پارێزگەهێن دهۆك، هەولێر، سلێمانی و ئیدارا سەربەخوەیا زاخۆ كربوون ژبۆ دیتن و دووڤچوونا هەر پێنچ یاریگەهێن وەرزشی ل سەر ئاستێ هەرێمێ دگەل ژێرخانەیا وەرزشی، ئۆتێل وجهێن پێدڤی وەكو بادەكا هەرێما كوردستانێ، هەر ژ دیتنا دەستپێكی رازەمەندی ل سەر هاتیە كرن و كەیفخوەشیا خوە دیار كر كوردستان ژ هەموو هەرێمێن دیتر یا بەرهەڤە بۆ مێڤانداریێ و گونجای ترە.
• كیش هەرێم هەڤڕكا سەرەكی یا كوردستانێ بوو؟
سەرباری هەشت هەرێمان داخوازا مێڤانداریێ كربوون لێ هەڤڕكی د ناڤبەرا هەردو هەرێمێن كوردستانێ و ترۆنگ بوو یا فێتنامێ بۆ قارەمانیا هەرێمان كۆنیفا 2024ێ یا دژوار بوو پشتی د كۆمبوونا دووماهیێ یا سەرۆك ئێكەتیێن هەرێمێن جیهانێ هاتیە كرن، لێ ژێرخانە و بادەكا كوردستانێ زێدەتر دەنگێن رازیبوونێ وەرگرتن.
• سەرۆكێ حوكمەتا هەرێمێ پشتەڤانێ سەرەكی بوو
ئازاد محەمەد دیار كر سەرۆكێ حوكمەتا هەرێما كوردستانێ مەسرۆر بارزانی پشتەڤانیا خوە یا تەمام بۆ مێڤانداریا قارەمانیێ دیار كری بوو و ئەڤچەندە ژی بوو ئەگەرێ سەرەكی و مەرەم ژی زێدەتر ناساندنا هەرێما كوردستانێ ب كەلەتۆر و دیرۆكا خوە بۆ هەموو هەرێمێن جیهانێ بهێتە دیاركرن و كوردستان ژی حەز و ڤیانا وەرزشێ هەیە.
• چەند هەلبژارتی دێ پشكداربن؟
ل دووڤ لیستەیا بەلاڤبوویی ژ ئێكەتیا كۆنیفایێ 48 هەلبژارتی دێ هەڤڕكیێ بۆ 15 پلێتنێن دەربازبوونێ بەر ب قارمانیا كۆنفایی كەن، دگەل هەلبژارتیێ مێڤاندار دێ بنە 16 هەلبژارتیی كو دووڤ هژمارا تیما بۆ هەموو كێشوەران هاتینە بەلاڤكرن بڤی رەنگی: ژ ئۆرۆپا شەش هەلبژارتی، ئەمریكا باشۆر دو، ئاسیا دو، ئەمریكا باكۆر ژی دو و هەر ئێك ژ كێشوەرێ ئەفریقیا، ئۆقیانۆس دێ پشكداربن، دگەل هەلبژارتیێ مێڤان، هەرچەندە ل كێشوەریێن ئۆرۆپا، ئاسیا، ئەمریكا باشۆر و باكۆر دگەل ئەفریقا رێژا هەلبژارتیان زێدەترن لێ لدووڤ سیستەمێ هاتیە دیاركرن دێ ئەو دناڤبەرا خوە دا ڤاڤارتنان كەن ژبۆ وەرگرتنا پلێتێن دەربازبوونێ.
• سیستەمێ قارەمانیێ و مێڤانداریێ
ئێكەتیا كۆنیفایێ دیار كربوو شێوازێ قارەمانیێ دێ ل سەر چار كۆمان هێنە بەلاڤكرن و ل پێنچ یاریگەهێن باژێرێن كوردستانێ هاتینە دەستنیشانكرن لێ دێ بڕیارا دووماهیێ پشتی رازیبوون دهێتە وەرگرتن دێ دیاربیت كو چاوانیا بڕێڤەبرنێ و بەلاڤكرنا هەر كۆمەكێ ل كێش یاریگەهێ بیت.
بۆ زانین قارەمانیا كۆنیفا یا هەرێما ل سالا 2014ێ دەستپێكر بوو، ئەوا هەر دو سالان جارەكێ ل هەرێمەكا وەلاتێن جیهانێ دهێتە رێكخستن، ئەڤ قارەمانیە دبیتە یا پێنجێ پشتی دووماهی قارەمانی ل 2020 ژبەر كۆرۆنایێ بۆ ماوەیێ چار سالە هاتیە راوەستاندن.
