بەرهەڤیێن كوردستانێ بۆ مۆندیالا جیهانێ یا كۆنیفا 2024ێ بەردەوامن
قەیس وەیس:
پشتی ل ناڤەراستا مەها شوباتا بۆری شاندەكێ فیدراسیۆنا تەپا پێی ل وەلاتێ هنگارییا پشكداری كۆمبوونا سالانە یا فیدراسیۆنا جیهانی كۆنیفا بۆ هەرێمێن جیهانی بووی، كوردستان وەكو مێڤاندارا كۆپا هەرێمان 2024ێ بەردەوامە ل سەر بەرهەڤیێن خوە یێن لوجستی ب شێوەیی هونەری، كارگێری، تەكتیكی و بەرهەڤكرنا لژنەیان ئەوا ب پشتەڤانییا ئێكسەر یا مەسرۆر بارزانی سەرۆكێ هەرێما كوردستانێ دێ ل 26ێ خزیرانێ هەتا شەشێ تەمووزا ئەڤ سالە چار یاریگەهێن ل چار باژێرێن كوردستانێ بهێنە ئەنجامدان.
د كۆمبوونا شوباتا بۆری ل بۆدابیست پایتەختێ هنگارییا پشككێشانا قارەمانییا جیهانێ یا هەرێمان كۆنیفا 2024ێ هاتبوو كرن، ئەوا دێ ب پشكدارییا 14 هەلبژارتیێن هەرێمێن جیهانێ بن و هاتینە بەلاڤكرن ل سەر چار كۆمان و بڤی رەنگێ خوارێ:
كۆما ئێكێ: كوردستان، كیرنۆ – بریتانیا، كاشمیر-پاكستان، تامیل ئیلام- سریلانكا.
كۆما دویێ: پەنجاب- هندستان، رایپا نویی- بۆلیڤیا، ئۆستیتا یا باشۆر- جورجیا و رۆسیا، كانتۆ تایكینۆ-سویسرا.
كۆما سێیێ: كاربالتاجا-هنگاریا و ئۆكراینا، كابیلییا-جەزائیر، تبت-هندستان، ساۆپولۆ- بەرازیل.
كۆما چارێ: سیزكلێر سیزنا- ئیتالیا، ئەبخازیا- رۆسیا، باسچێت- رۆمانیا.، ماولی سۆر- چیكیا.
ئەو یاریگەهێن دێ پێشوازییا قارەمانیێ كەن
ل دووڤ بەرنامەیێ هاتیە راگەهاندن ژلایێ فیدراسیۆنا تەپا پێی یا كوردستانێ قارەمانی دێ ل یاریگەهێن پارێزگەهێن دهۆك، هەولێرا پایتەخت، سلێمانی و ئیدارا سەربەخوەیا زاخۆ هێنە ئەنجامدان پشتی رازیبوونا فیدراسیۆنا كۆنیفایی ب هەبوونا ژێرخانەیا وەرزشی ل ئەڤان پارێزگەهان هاتیە كرن.
ل سەر راسپارد و پشتەڤانییا مەسرۆر بارزانی سەرۆكێ حوكمەتا هەرێما كوردستانێ كو پشتەڤانیا خوە یا ئێكسەر بۆ مێڤانداریا قارەمانیێ دیار كر بوو، ئەڤچەندە بوو ئەگەرێ سەرەكی قارەمانی ل كوردستانێ بهێتە ئەنجامدان و مەرەما سەرەكی ژی ناساندنا هەرێما كوردستانێ ب كەلەتۆر و دیرۆكا بۆ هەمی هەرێمێن جیهانێ یێن پشكدار بهێتە دیاركرن و كوردستان ژی حەز و ڤیانا وەرزشێ یا هەی.
بۆ زانین قارەمانیا كۆنیفا یا هەرێما ل سالا 2014ێ دەستپێكر بوو، ئەوا هەر دو سالان جارەێ ل ئێك ژ هەرێمێن جیهانێ دهێتە رێكخستن، ئەڤ قارەمانییە یا پێنجێ یە پشتی دووماهی قارەمانی ل 2020 هاتبووكرن و راوەستیانا وێ ژبەر كۆرۆنایێ بوو.
