بەرهەڤی بۆ دانانا سیستەمێ ڤارێ ل یاریگەهێن دهۆك و زاخۆ دهێنە كرن
قەیس وەیس:
فیدراسیونا تەپا پێی یا ئیراقێ شاندەكێ بلند یێ دۆڤچوون و دانانا سیستەمێ ڤار ل ئیراقێ هنارتبوو یاریگەهێن یانەیا دهۆك و زاخۆ و چەند تێبینی و خالێن دانانێ دەستنیشانكرینە و بڕیارە ل ناڤەراستا مەها بهێت دۆبارە سەرەدانێ بكەن پێخەمەت دەستویرییا دووماهیێ یا سیستەمێ ڤارێ.
ل دۆر ڤێ یەكێ هەڤال ئەحمەد بریفكی رێڤەبەرێ رێپێدانێ ل یانەیا دهۆك بۆ رۆژنامەیا ئەڤرۆ گۆت: ل دووڤ بەرنامەیێ فیدراسیونا تەپا پێی و دەستەیا لالیگا یا ئسپانی ژبۆ پیشەكاریكرنا خولا ئیراقێ و دووڤ ستاندەرێن فیفایێ، ل پێنچ شەمبییا بۆری شاندەكێ بلند یێ دۆڤچوونا مەرجێن سیستەمێ ڤار پێكهاتی بوون ژ لوئەیی سوبحی رێكخەرێ فیفایێ بۆ مۆلەتا رێپێدانا یاریگەهان، محەمەد هیجل رێڤەبەرێ كۆمپانییا عەشتار یا ڤەگۆهاستنا تلەفزیونی و سەرپەرشتیارێ ئەندازیاری و تەكنیكی یا تەكنەلۆجیا ڤارێ سەرەدانا یاریگەها دهۆكێ كر و دوڤچوونا هەمی جهێن پێدڤی بۆ سیستەمێ دیاركری، چەند تێبینی و خال ژبۆ درۆستكرنا ئەوێ سیستەمی دناڤ و دەرڤەیی یاریگەهێ دەستنیشانكرن پێخەمەت دانانا وێ كو دبیت هەتا 18 كامیرە ژلایێ كۆمپانیێ بهێنە دانان، وەكو یانەیا دهۆك یا دشیان دا بیت بەردەوامین پێخەمەت باشترین شێوە ل دووڤ ستاندرێن فیفایی كار بهێتە كرن.
ژلایێ خوەڤە ژی عادل رەمزی سندی رێڤەبەرێ رێپێدانێ بەرپرسێ راگەهاندنا یانەیا زاخۆ ژی ب هەمان شێوە دیار كر و گۆت: لژنەیا هاتییە یاریگەها زاخۆ چەند جهێن پێدڤی بۆ كارێ بڕێڤەبرنا سیستەمێ ڤارێ هاتینە دیاركرن و ئەو جهێن دانانا كامیرێ و شاشەیا دناڤ یاریگەهێ و چەندین ئامیرەیێن دی، كارگێرییا یانەیا زاخۆ ژی بەرهەڤییا خوە دیاركرییە و دێ كار كەین هەتا بەری ب دووماهی هاتنا ژڤانێ دەستنیشانكری بۆ مولەتێ.
بۆ زانین هەردو یاریگەهێن دهۆك و زاخۆ ژلایێ فیدراسیونا تەپا پێی یا ئیراقێ وەكو یاریگەهێن باوەرپێكری نە و پشتی ب جهئینانا رێنمایێن گێرێدایی ب ڤارێ و شاشەیان و چەند خالێن دێ ل 15ێ مەها بهێت ب فەرمی مۆلەت بۆ هێتە دان.
