بەرهەڤی بۆ هاتنا هەژمارەكا بەرچاڤ یا گەشتیاران دهێتەکرن
هەولێر، قائید میرۆ:
پەیڤدارێ دەستەیا گەشتوگوزارا هەرێما كوردستانێ ئاشكرا كر، دهێتە پێشبینیكرن هەژمارەكا بەرچاڤ یا گەشتیاران ل رۆژێن جەژنا رەمەزانێ سەرەدانا هەرێما كوردستانێ بكەن و دبێژیت: ل گەل زالگەهێن ئاسایشێ ب باشترین شێواز، پێشوازی ل گەشتیاران دێ هێتە كرن.
ئیبراهیم عەبدلمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، دهێتە پێشبینیكرن ل رۆژێن بێهنڤەدانا جەژنا رەمەزانێ هەژمارەكا زۆرا گەشتیاران سەرەدانا جهێن گەشتوگوزاری یێن هەرێما كوردستانێ بكەن و گۆت: «نوكە دەستەیا گشتیا گەشتوگوزارێ بەرهەڤیان بۆ چاوانیا پێشوازیكرنێ ل گەشتیاران دكەت و هەماهەنگی و هەڤكاری ل گەل زالگەهێن ئاسایشێ ژی هاتیە كرن، داكو ب باشترین شێوە پێشوازی ل گەشتیاران بهێتە كرن».
ئیبراهیم عەبدولمەجید گۆتژی: «ژ بەركو جەژنا نەورۆزێ كەفتە د مەها رەمەزانێ دا و خەلك نەشیا دەركەڤیت، لەوڕا دهێتە پێشبینیكرن ل بێهنڤەدانا جەژنێ هەژمارەكا زێدە یا گەشتیاران سەرەدانا هەرێما كوردستانێ بكەن، هاتنا ڤێ هەژمارا گەشتیاران ژی دێ كارتێكرن ل سەر ڤەژاندنا كەرتێ گەشتیاری هەبیت و دێ بیتە دەستپێكا هاتنا گەشتیاران بۆ سالا نوو و هاتنا وەرزێ گەشتوگوزارێ».
