بەرپرسێ لقێ 18: سەركەفتنێن مەزنتر ل پێشیا مەنە
ئامێدیێ، مەحمود نهێلی:
بەرەڤان حەمدی، ئەندامێ كومیتا ناڤەندی و بەرپرسێ لقێ 18 یێ پارتی ل ئامێدیێ د رێورەسمەكێ دا پیرۆزباهیێن سەركەفتنا هەلبژارتنان و سەركەفتنا پارتی ل میحوەرێ ئامێدیێ گەهاندنە هەمیان و دبێژیت: سەركەفتنێن مەزنتر ل پێشیا مەنە و دێ ریكوردێن نوو توماركەین.
ناڤهاتی ب ناڤێ سەرۆك بارزانی، سەركردایەتیا پارتی، كۆمیتا ناڤەندی، مەكتەبا ڕێكخستنا دهۆكێ و لقێ 18، دەستخوەشی ل ستافێ میحوەری و هەموو هەڤالێن د گەل دا كاركری و تەڤایا دەنگدەرێن پارتی ل سنوورێ دەڤەرداریێ كر و گوت: «سەركەفتنا ڤێ جارێ ل سنوورێ ڤێ ناوچێ بەراورد ب هەلبژاتنێن بۆری، یا مەزن و دیرۆكی بوو، سەرەرای هەبوونا هەڤڕكیان».
بەرپرسێ لقێ چەندین ئامار بەرچاڤكرن، كو جوداهیا ڕێژێن پشكداریێ و دەنگێن پارتی و ڕێژا دەنگێن پارتی بەراورد ب هەلژارتنێن بۆری دیار دكەن و گوت: «ئەڤ ئەنجامە بەرپرساتیەكا مەزنتر دئێخنە سەر ملێن مە ژ بۆ پاراستن و باشتركرنا ڤان ئەنجامان، دیسا ل هەمان دەم بۆ داهاتی دێ بنە فاكتەرەك، كو حكومەت ب چاڤەكێ باشتر تەماشەی دەڤەرێ بكەت و پتر پڕۆژە و خزمەتگوزاری بۆ دەڤەرێ بهێنە تەرخاكرن».
سەبارەت قووناغا داویا هەلبژاتنان و پێكئینان حكومەتێ، تەكەز كر، پارتی چ هێلێن سۆر نینن و مەرجێن پارتی ب تنێ ئەون یێن د بەرژەوەندیا مللەتێ كورد و كوردستانێ دا، وەكو: هەبوونا پەرلەمانەكێ كارا ژ بۆ پەسەندكرنا یاسایێن د بەرژەوەندیا كوردستانێ و خەلكێ وێ دا، حكومەتەكا بهێز و ئێكگرتی و ب بەرنامەكێ رۆهن بۆ پاراستنا قەوارێ هەرێمێ و خزمەتا خەلكێ وێ، ئێكگرتنا هێزێن پێشمەرگەی، كو تاكە ئەركێ وێ پاراستنا ئاخ و خەلكێ كوردستانێ بیت».
بەرپرسێ لقێ 18 یێ پارتی ل ئامێدیێ ل داویێ گۆت: «ئەڤ سەركەفتنە ئەركێن مە پتر و مەزنتر لێدكەت و ئەگەر هەر ئەڤرۆ ب هەمان میكانزم و پلان و بەرچاڤرۆهنی و ئێك تیمی ئەم كار بكەین، بێ گومان سەركەفتنێن مەزنتر ل پێشیا مەنە و دێ ریكوردێن نوو تۆماركەین.
