بەرپرسێ لقێ 18: پارتی ژ بۆ گەهشتن ب هیڤیێن گەلێ مە هاتیە دامەزراندن
ئامێدیێ، مەحمود نهێلی:
بەهرام عەریف یاسین، بەرپرسێ لقێ 18 یێ پارتی ل ئامێدیی د سمینارەكێ دا بۆ هەلبژێر و كەسایەتی و كادر و رێڤەبەرێن دام و دەزگەهێن میری دیار كر، بزاڤێن پارتی ژ بۆ پێكئینانا حكومەتەكا بهێز و خزمەتكار د بەردەوامن، پارتی ژ پێخەمەت بەرژەوەندیا گشتی یا بەرهەڤە دەست ژ هندەك ماف و شایستەیێن خۆ یێن دەرئەنجامێ هەلبژارتنان بەردەت.
ناڤهاتی د سمینارا خۆ دا گۆت: «داكو ژ ڤێ قووناغێ دەرباز ببین، مە پێدڤی ب ئێكڕێزی و ئێكهەلوەستیێ هەیە و پارتی بۆ ڤێ كار دكەت، دیسا تەسلیمبوون نە ژ بنەمایێن رێبازا بارزانی و پارتییە لێ ژ بۆ چارەسەریێ د بەرهەڤین تا دووماهیك خال بچین و دەمێ پێدڤی دێ بڕیارێن پێدڤی هەبن».
ئاشكرا ژی كر، ژ بۆ پاراساتنا مافێن هەرێمێ یێن دەستۆری و خەلكێ وێ، پارتی دێ هەموو رێیان گریتە بەر و گۆت: «ئەڤ رەوشا یا بەردەوام نابیت و چارەسەری ب رێڤەیە».
گۆتژی: «دوژمن نوكە دو جۆرە شەڕان ل گەل خەلكێ مە دكەن، یا ئێكێ: نەهێلانا هەستێ نەتوایەتی و نشتیمانی یە و یا دویێ: دەروونییە و ب تایبەت ب رێیا ماددەیێن هۆشبەر، لەو پێدڤییە ئەم هەموو كادر و وەلاتی و دام و دەزگەهێن میری كار بكەین ژ بۆ خزمەتا گشتی وەكو ئێك تیم».
بەرپرسێ لقێ هەژدە گۆت: «زێدەباری بڕینا بودجەی، لێ پڕۆژە و خزمەتگوزاری ژ لایێ حكومەتا هەرێمێ ڤە دبەرداومن و دێ د بەروام ژی بن، پارتی هاتیە دامەزراندن، داكو ببیتە ئامرازەك ژ بۆ گەهشتن ب هیڤیێن گەلێ مە و خزمەتكرنا وەلاتیان».
