بەرھەمێ گولبەرۆژان ل دەڤەرێن ئامێدیێ و بارزان بەر ب نەمانێ دچیت
ئەڤرۆ نیوز، نەوزاد ھلۆری:
گولبەروژ ئێکە ژ بەرھەمێن ھاڤینی و سالانە ل دەڤەرێن جوداجودایێن ھەرێما کوردستانێ دھێنە چاندن، سەرەرای کو بەری نھا بەرھەمێ گولبەروژێ ل ھەردوو دەڤەرێن بارزان و ئامێدیێ زوربوو بەلێ نھا بەر ب نەمانێ ڤە چیت.
سپیان عەبدولخالق ئێکە ژ جوتیارێن سنوورێ ناحیا شێلادزێ و پێشتر چەندین جاران گولبەروژ بەرھەمدئینان بۆ ئەڤرۆ نیوز گۆت: (دوو ئەگەرێن سەرەکی بویە سەدەم کو ئەم دەستبەرداری چاندنا گولبەروژان بین یان ژی بەرھەمێ وێ کێم بیت، کو ئەو ژی دەرکەفتنا ھژمارەکا زور یا چیچک و بالندەیان و خوارنا وان ژلایێ وانڤە ، و دەرکەفتنا ھژمارەکا زور یا مێریان، و دیسان ئەگەرا دویێ ژی کو ژ ھەمووان خراپترە ئەرزانبوونا گولبەروژا ل بازاری و نەبوونا چوو کارگەھێن درۆستکرنا چەرەزان ل دەڤەرێ).
زێدەتر گۆت: (بەری نھا سالانە نێزیکێ سێ زەڤیێن مەزن یێن گولبەروژان من دچاندن بەلێ نھا زور ب کێمی دچینم ، و پرانیا ئەو کەسێن کو نھا گولبەروژان ژی دچینن ب تنێ بو مەرەما دەستکەفتنا توفکێن وایە وەکو چەرەزات).
بەھمەن عەبدوللا وەلاتیەکێ گوندێ بالندا یا سەر ب دەڤەرا بارزایە و زەڤیەکا مەزن یا گولبەروژان چاندیە بو ئەڤرۆ نیوز گۆت: (چاندنا گولبەروژان ھێشتا ل ھەرێما کوردستانێ نەبویە پێشە ، بەلکو شێوازەکێ دەمکی یە و ل گەل نەبوونا بازاری داوی دھێت، من زەڤیەکا مەزن یا گولبەروژان ل چاندیە و ھەتا نوکە بەرھەمەکێ باش ھەیە، من مەرەم فروتنە و کیلو دناڤبەرا سێ بو پێنج ھزار دیناران دھێتە فروتن و پرانیا ئەو خەلکێ کو نھا گولبەروژان دکرن ، دکرن بو توفکی و دووبارە چاندنێ چونکی بەرھەمێ وان زور کێمبوویە).
زێدەتر گۆت: (ئەگەر کارگەھەکا درۆستکرنا چەرەزاتان ل دەڤەرێ بھێتەڤەکرن و ھاریکاریا جوتیاران بھێتەکرن، دێ ھژمارەکا زور یا جوتیاران زەڤیێن خوە کەنە گولبەروژ ، ھەلبەت گولبەروژ ئێکە ژ وان بەرھەمێن کو چاندنا وێ یا ب خێرە و ب فروتنا بەرھەمێن وێ سالانە داھاتەکێ باش دەست مرۆڤی دکەڤیت).
