بەری ب دووماهی هاتنا خولێ شورتە بوو قارەمان و زاخۆ پلێتەكا دەرڤە مسۆگەر كر
قەیس وەیس:
ب فەرمی تیما یانەیا شورتە و بۆ جارا چارێ ل دووڤ ئێك ناسناڤێ خولا ستتێرێن ئیراقێ بۆ وەرزێ 2024-2025ێ ب دەستڤە ئینا بەری ب دووماهی هاتنا خولێ ب دو گەڕان، پشتی ب سێ گۆلان بەرانبەر گۆلەكێ سەركەڤتن ل سەر یانەیا نەفت بەسرا ئینایی، خالێن خوە گەهاندە 83 خالان سەرێ لیستا خولێ دهێت ب نەهـ خالان ژ نێزكترین هەڤڕكا خوە یانەیا زەورا ئەوا ب74 خالان رێزا دویێ دهێت، ژلایێ خوەڤە تیما زاخۆ ڕێزا سێیێ پاراست و پلێتا قارەمانییەكا دەرڤە مسۆگەر كر پشتی خالێن خوە گەهاندینە 67 خالان، د یارییا واندا ئەوا ژ چارچووڤەیێ هەڤڕكیێن گەڕا 36ێ یا خولێ هاتییە كرن، ژلایەكێ دووڤە هەردو یانەیێن كەربەلا و حدود ئەوێن رێزێن 19ێ و 20ێ و دووماهیێ هاتین پاشڤە چوونە خولا پلا نایاب،.
زاخۆ پلێتەكا دەرڤە پاراست
تیما فوتبۆلا یانەیا زاخۆ پشكدارییەكا دەرڤە مسۆگەر كر پشتی شیایی دگەل یانەیا نەجەف بێ گۆل وەكهەڤبووین ژ گەڕا 36ێ ب جووداهییا 10 خالان دووركەڤت ژ هەڤڕكا خوە خودانا ڕێزا چارێ یانەیا تەلەبە ئەوا 57 خال كۆمكرین، ل دووڤ ڕێنمایێن فدراسیۆنا فوتبۆلا ئیراقێ یانەیێن ڕێزا ئێكێ و قارەمانا كۆپا ئیراقێ دێ پشكداری د كۆپا ئاسیا دا كەن، یانەیا ڕێزا دویێ بۆ كۆپا كەنداڤی و یا سێیێ بۆ كۆپا عەرەبی كەن.
دهۆك و كۆپا كەنداڤی
ل دووڤ ژێدەرێن تایبەت و گۆتگۆتێن رۆژنامەڤانی دبیت دۆبارە یانەیا دهۆك قارەمانا وەرزێ بۆری یا كۆپا كەنداڤی دۆبارە بۆ وەزرێ نوو پشكداریێ د كۆپا كەنداڤی دا بكەت، ئەوێ ژێدەری دیاركرییە فدراسیۆنا كەنداڤی بزاڤێ دكەن هژمارەیا پشكداران زێدەبەت و قارەمانا وەرزێ پێشتر پشكداری كۆپایێ دا بكەت، دوور ژ ڕێزبەندییا وێ د خولا وەلاتێ خوە دا هەبیت، یان ژی ڕێپێدانا ئاسیایی ژی نە وەرگرت بیت، هەرچەندە ئەڤ قارەمانییە ژلایێ فدراسیۆنا فوتبۆلا ئاسیا یا فەرمی نینە.
چەند یانە بووینە قارەمانێن خولێ
ب ناسناڤێ وەرزێ ئەڤ سالە یانەیا شورتە یا بەغدایی ناسناڤێن خوە گەهاندنە یا هەشتێ د دیرۆكا خوە دا، ئەوا یانەیا زەورا 14 جاران دەستڤە ئینایی، هەروەسان جەوییە حەفت جاران، تەلەبە پێنچ ناسناڤ، هەولێر چار ناسناڤ، رەشید سێ ناسناڤ دەستڤە ئیناینە، هەر ئێك ژ یانەیێن دهۆك، جەیش، نەفت وەسەت، مینا، سەلاحەدین ئێك ناسناڤێ خولا ئیراقێ ب دەستڤەئینانە.
ب گشتی 80 یانەیان پشكداری د خولێ دا كرینە ئەوا هەر ژ وەرزێ 1974-1975ێ دەستپێكری، هەردو یانەیێن شورتە و جەوییە ئێكانە یانەیێن پشكداری د هەموو وەرزان دا كرینە كو 51 وەرزان ل دووڤ ئێك، ژلایێ خوەڤە هەردو یانەیین تەلەبە و زەورا 50 جاران پشكدار بووینە، ل سەر ئاستێ یانەیێن كوردستانی پشكداریێن وان بڤی شێوەیی بووینە.
هەولێر 33 جاران، دهۆك 22 جاران، زاخۆ 20 جاران، سلێمانییە نەهـ جاران، پیرس پێنچ وەرزان، نەورۆز و سیرۆانی نوو چار وەرزان، هەر ئێك ژ ئارارات، پێشمەرگە ئێك وەرز پشكداربووینە.
گۆلكەرێن دیرۆكی كینە؟
ل دووڤ تۆمارا هاتییە بەلاڤكرن هێرشبەرێ یانەیا جەوییە ئەمجەد رازی دبیتە گۆلكەرێ دیرۆكی یێ خولێ ب كۆمكرنا 181 خالان، دگەل جەوییە 98 گۆل، دگەل هەولێر 75 گۆل و دگەل نەجەف هەشت گۆل، دووڤدا ساحب عەباس 177 گۆل، دیسان كەریم سەدام 171 گۆل، گۆلكەرێ دیرۆكی یێ یانەیا دهۆك حسێن عەبدوللا ل رێزا شەشێ دهێت ب167 گۆلان ژ وانا 58 گۆل بۆ دهۆكێ و پێنچ گۆل بۆ پیرس تۆماركرینە.
ئێكەمینێن خولێ
ئێكەم گۆل د خولا ئیراقێ دا ژلایێ فەلاح حەسەن ل چارێ چرییا ئێكێ یا سالا 1974ێ، زوورترین گۆل د ئێك وەرز دا 36 گۆل هەنە ژلایێ یاریزانێ شورتە یونس عەبد عەلی ل وەرزێ 1993-1994 دا، دیسان بلەزترین گۆل یا یاریزانێ شورتە عەلا عەبدولزەهرە دگەل شورتە ل 2018ێ دچركا نەهێ دا گۆل ل سەر نەفت ئەلجنوب ئینابوو، ئێكەم هاتریك ژلایێ یاریزان جان میشیل نلند یاریزانێ شورتە ل2012ێ بوو، ئێكەم گۆلا گۆلپارێزی یا رەعد حەمودی گۆلپارێزێ یانەیا شورتە ل وەرزێ 1975-1976ێ بوو.
ئەڤرۆ دێ ژڤانێ كۆپا ئیراقێ و دیاركرنا چەند پێزانینان
بڕیارە ئەڤرۆ ل دەمژمێر شەشێ ئێڤارییا درەنگ لژنەیا بەریكانەیا ل فدراسیۆنا فوتبۆلا ئیراقێ دێ كۆنگرەیێ رۆژنامەڤانی دانیت ژبۆ دیار كرنا پشككێشانا قۆناغا چارێك دووماهی و ژڤانێ یاریێن كۆپا ئیراقێ ئەوا هەشت یانە ماینە ئەو ژی هەر ئێك ژ، دهۆك، زاخۆ، نەورۆز، شورتە، تەلەیە، جەوییە، نەجەف و مینا، دیسان دێ ژڤانێ دووماهیێ یا هەموو خولێن وەرزێ ئەڤ سالە یێن ستێرا ئیراقێ، پلا نایاب، پلا دو و خولێن ئاستێن جودا و دیاركرنا ئامارێن هەموو خولان.
