بەری خول دەستپێبكەت بۆ دو ئارمانجان پلان هاتیە دانان
پشتی كاراكرن و ڤەگەڕیانا یانەیا پیرس یا وەرزشی بۆ ناڤ خول و چالاكیێن كوردستانێ ئەڤە بۆ ماوەیێ نێزیكی دو سالە ئەكادیمییا یانەیێ ب سەرپەرشتیا راهێنەرێ گەنج هەرژەنگ بابەكر زێباری ب ناڤێ تیما تەپا پێی یا لاوێن پیرس بەرهەڤی دكرن بۆ وەرزێ نوو یێ خولا كوردستانێ وەكو پێنگاڤا ئێكێ بۆ ڤەگەڕیانا ب هێز و پشتبەستن ل سەر كوڕێن باژێرێ دهۆكێ ، د ئێكەم یاریا خوە یا خولێ دا شیان سەركەفتنەكا مەزن ل سەر مێڤانا خوە یانەیا رەواندۆز ب چار گۆلان بێ بەرانبەر بینن، ل دۆر هیڤی و ئۆمێدێن ئەڤێ تیمێ راهێنەرێ ناڤهاتی بۆ رۆژنامەیا ئەڤرۆ دیار كر بەری دەستپێكرنا خولێ ئەوان دو ئارمانج كرینە پلان و گەشبینن ئەو تیما ل سەر بنیاتەكێ ئەكادیمی هاتییە ئاڤاكرن هەڤڕكیێ ل سەر ناسناڤی بكەت.
زێدەتر ناڤهاتی گۆت: بەری دەستپێكرنا وەرزێ نوو یێ خولا كوردستانێ ل سەر ئاستێ لاوان وەكو كادرێ راهینانێ مە پلان دانایە ب دو ئارمانجان پشكداریێ د خولێ دا بكەین ئەو ژی دەستپێكێ هزر د چاوانییا دەربازبوون بۆ قۆناغا دویێ و كار ل سەر هاتیە كرن بۆ یاریێن خولێ و دەستڤە ئینانا سەركەفتنا و كۆمكرنا خالان، ئارمانجا دویێ كو دبیتە یا هەڤڕكیێ ل سەر ناسناڤێ وەرزێ ئەڤ سالە، دبیت ئەركێ مە ب سانەهی نەبیت و پشكدارییا مە یا ئێكێ بیت، لێ مە باوەریەكا باش ب یاریزانێن خوە هەیە ئەوێن ب شێوەیێ ئەكادیمی و زانستیا وەرزشی هاتینە فێركرن، هەروەسان بەری دەستپێكرنا خولێ ژی چەندین یاریێن هەڤالینی ئەنجامداینە تایبەت دگەل تیمێن نوكە پشكدار، یا دشیان دا بیت دێ كار كەین وەكو ئێك ژ ژنوونەرا پارێزگەها دهۆكێ ببنە هەڤڕك.
ژلایەكێ دووڤە هەرژەنگ بابەكر ئاماژە دا ب وێ یەكێ ژبەر كو بشێوەیێ ئەكادیمی یاریزان هەر ژ یێ پشكۆژ هاتینە فێركرن د نوكە دا نێزیكی 10 یاریزانێن تیمێ ژ دایكبوویێن 2006ێ نە و ئەڤ یاریزانە دشێن هەتا سێ سالێن دی ژی وەكو ماف یاریێ دگەل تیما لاوان د خولێن كوردستانێ و ئیراقێ دا بكەن.
بۆ زانین 21 یانە پشكدارن د خولا لاوان دا و هاتینە بەلاڤكرن ل سەر چار كۆما و یاریێن وان ب شێوەیێ خول ئێك قۆناغ بۆ هەر پێنج رۆژان گەڕەك دهێتە كرن، لاوێن پیرس د كۆما ئێكێ دایە دگەل یانەیێن ژ هندرین، رەواندۆز، خاك و پێشمەرگەیا هەولێر، سەركەفتیێن ئێكێ و دویێ یێن هەر كۆمەكێ دێ دەربازبنە قۆناغا دویێ، یانەیێن پیرس، بەردەرەش و لاوێن شنگال نوونەرێن پارێزگەها دهۆكێ د خولا لاوان دا پشكدارن.
