بەری دووماهییا سالێ دەلیڤەیەكا زێڕین ل پێشبەری ئەلهۆیێن چیایە
قەیس وەیس:
چاڤەڕێ دهێتە كرن تیما فوتبۆلا یانەیا دهۆك ل شەمبییا بهێت ڕێكەفتی 28ێ ڤێ مەهێ ژ دەرڤەیی یاریگەها خوە ببیتە مێڤانا یانەیا نەورۆز ل باژێرێ سلێمانیێ، ژ چارچووڤەیێ یاریێن گەڕا نەهێ كو دبیتە یارییا سێیێ یا پاشئێخستی ژ خولا ستێرێن ئیراقێ د ماوەیێ دەهـ رۆژان دا تیما دهۆكێ ئەنجامدەت و دێ دبیتە دووماهی یارییا ئەلهۆیێن چیا د سالا 2024ێ دا.
دهۆكێ چاڤ ل رێزبەندییا شەشێ یە
تیما ئەلهۆیێن چیا دێ یاریێ بۆ سەركەفتنێ كەن و هەموو هیڤی و ئارمانجا وان ب دەستڤە ئینانا سێ خالێن یاریێ نە و بەردەوامیێ ب دەتە پێشڤەچوونا خوە بۆ رێزا باشتر د لیستەیا خولێ دا، د نوكە دا تیما دهۆكێ 15 خال كۆمكرینە ژ چار سەركەفتن، سێ وەكهەڤییان و سێ خوسارەتی هەنە رێزا 10ێ دهێت، لێ سەركەفتن د ڤێ یاریێ دا دێ پێشڤەچوونەكا باش ب خوەڤە گریت كو پێنچ رێزا پێشڤە چیتە پێشییا لیستێ و دبیت بگەهیتە ڕێزا شەشێ، ژبەركو ئەو یانەیێن رێزا شەشێ و حەفتێ 18 خال هەنە و جوداهییا گۆلان دهۆك دێ باشتر بیت، یێن رێزێن هەشتێ و نەهێ كێمترییا دو خالانە، ئانكو دەلیڤەكا زێرین بەردەستێ ئەلهۆیێن چیا هەیە بەری ب دووماهییا سالێ ئەو رێزا شەشێ وەربگرن.
ڕاهێنەرێ دهۆكێ: ژ بەر یاریێن پاشئێخستی هەتا نوكە مە مفا ژ بهێنڤەدانێ نە وەرگرت
د كۆنگرەیەكێ ڕۆژنامەڤانی دا پشتی یارییا بۆری دگەل ئەلقاسم ڕاهێنەرێ تیما یانەیا دهۆك یێ سویدی و ڕەكەز كوردێ باكۆر مەسعۆد میرال گۆت: پێخوەشحالین ل دووڤ پلانێن خوە ب سەركەفتیانە دەرباز دكەین، هەرچەندە ئاست و ئەنجامێن تیما مە بەر ب باشیێ دچن، لێ ژبەر یاریێن پاشئێخستی هەتا نوكە مە مفا ژ بهێنڤەدان و ڕاوەستیانا خولێ نە وەرگرتییە، د چار یارییان دا ئەم شیاین ئەنجام و ئاستەكێ دلخوەشكەر بینن تایبەت دلێ جەماوەرێ خوە خوەشبكەین و دێ بزاڤێ كەین یارییا بهێت ژی بەردەوامیێ بدەینە ئەنجامێن سەركەفتی.
سەرجەمێ گشتی یێ گۆلێن دهۆكێ د خولا ستێرێن ئیراقێ دا 13 گۆل بووینە و هاتینە بەلاڤكرن ل سەر حەفت یاریزانان ئەوێن پشكداری د تۆمار كرنا گۆلان دا هەی بۆ یانەیا دهۆكێ و بڤی ڕەنگی، پاشەنگ عەبدوللا چار گۆل، پیتەر گۆرگیس سێ گۆل شەرقی ئەلبەحری دو گۆل، هەر ئێك ژ بەیار ئەبۆ بەكر، یانیك زاكێری، كەریم دەرویش و كێلبرت كۆمسۆن گۆلەك تۆماركرینە.
هەلوەستێ گشتی پشتی ئەنجامدانا یاریێن پاشئێخستی، بۆ زانین ئەڤ لیستە پشتی ب دووماهی هاتنا یاریێن گەڕا 11ێ بوویە.
1- جەوییە 24 خال ژ دەهـ یارییان.
2- شورتە 21 خال ژ دەهـ یارییان.
3- نەفت 19 خال.
4- زاخۆ 19 خال.
5- زەورا 19 خال.
6- نەفت میسان 18 خال.
7- هەولێر 18 خال.
8- نەجەف 17 خال.
9- تەلەبە 17 خال.
10- دهۆك 15 خال ژدەهـ یارییان.
11- كارەبا 14 كارەبا
12- كەربەلا 14 خال.
13- كەرمە 14 خال.
14- مینا 12 خال ژ دەهـ یارییان.
15- نەفت ئەلبەسرا 11 خال.
16- ئەلقاسم 11 خال.
17- كەرخ 11 خال.
18- نەورۆز 8 خال ژ دەهـ یارییان.
19- دیالا چار خال.
20- حدود سێ خال ژ دەهـ یارییان.
