بەرێ بنیاتی بۆ چار پڕۆژەیان ل ئیدارەیا سەربخوە یا زاخۆ هاتە دانان
زاخۆ، عەلی و دلۆڤان:
د بەردەوامیا دروستكرنا پڕۆژەیان دا ل سنوورێ ئیدارەیا سەربخوە یا زاخۆ، د رێورەسمەكێ تایبەت دا ب گوژمێ نێزیكی دو ملیار دیناران بەرێ بنیاتی بۆ چار پڕۆژەیان ل سنوورێ ناوچەداریا رزگاری هاتە دانان.
د كۆنگرەیەكێ رۆژنامەڤانی دا گوهدار شێخۆ، سەرپەرشتێ ئیدارەیا سەربخوە یا زاخۆ دیار كر، ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ گوژمێ 30 ملیار دیناران بۆ ناوچەداریا رزگاری هاتینە تەرخانكرن و پڕۆژە د هەمی بیاڤان دا ب وی پارەی هاتینە بجهئینان و گۆت: «ئەم وەكو ئیدارەیا سەربخوە یا زاخۆ دێ گرنگیێ ب هەمی ئول و ئاینان دەین، مە بڕیار دایە هەر ئێك ژ كانیا دێرەبوونێ و كەنیسا مارگورگیس، كو ئێك ژ كەڤنترین كەنیسایە ل ئیراقێ و كوردستانێ، نووژەن بكەین، داكو ئەو جهە بهێنە پاراستن و گەشتیارێن ئایینی ژ ئێزدی و مەسیحیان قەستا دەڤەرێ بكەن هەر، دیسا د دەمەكێ نێزیك دا بەرێ بنیاتی بۆ هەژمارەكا پڕۆژەیێن دیتر ل ناوچەداریا رزگاری دێ هێتە دانان».
ناڤبری گۆتژی: «ب گوژمێ میارەك و 986 ملیۆن و 285 هزار دیناران بەرێ بنیاتی بۆ نووژەنكرنا كانیا دێرەبوونێ و هولا لالش و دێرا مارگورگیس و زالگەها زاخۆ یا نوو هاتە دانان و ئەم دخوازین ئەڤ دەڤەرە ژی ڤەژەنەكا باشتر ب خوەڤە ببینیت و ئێدی رێژەیا گەشتیارێن ئایینی ژی ل سنورێ ئیدارەیا سەربخوە یا زاخۆ زێدە ببیت» .
