بەرێ بنیاتی بۆ ئوڤەرپاس و ئەندەرپاسێن بناڤی ئێك و یۆتێرنا مالتایێ هاتە دانان
ب بەرهەڤبوونا ساسان عەونی، وەزیرێ باژێڕڤانی و گەشتوگوزارێ ل حوكمەتا هەرێما كوردستانێ ود. عەلی تەتەر، پارێزگارێ دهۆكێ و جەهوەر عەلی، دەڤەردارێ دهۆكێ و هەژمارەكا بەرپرسێن ئیداری دوهی 13/6/2023 بەرێ بنیاتی بۆ ئوڤەرپاس و ئەندەرپاسێن بناڤی ئێك و یۆتێرنا مالتایێ ل سەر جادا بارزان وەكو قووناغا ئێكێ هاتە دانان.
پارێزگارێ دهۆكێ د پەیڤەكێ دا گرنگیا ڤی پڕۆژەی بەرچاڤكر و گۆت: «ئەڤ پڕۆژە دێ خزمەتا وەلاتیێن كوردستانێ ب گشتی و وەلاتیێن پارێزگەها دهۆكێ ب تایبەتی كەت، چونكو رێكا نیڤدەولەتی ژ ئیبراهیم خەلیل هەتا دهۆكێ و دگەهیتە شێخان دێ یا ڤەكری بیت و بێ ترافیك هاتنوچوون دێ ئاسایی بیت و بەروڤاژی».
پارێزگارێ دهۆكێ د پەیڤا خوە دا زێدەتر گۆت: «ل دووڤ راسپاردێن مەسرور بارزانی، سەرۆكێ حوكمەتا هەرێما كوردستانێ پڕۆژەیێن ئاڤەدانكرنێ دێ بەردەوام بن و پلان هەیە، كو ئوڤەرپاسا شێخان ژی بهێتە چێكرن و هاتنوچوون ژ زاخۆ هەتا هەولێرێ بێ ترافیك یا ڤەكری بیت».
پاشی ساسان عەونی، وەزیرێ باژێڕڤانی و گەشتوگوزارێ گرنگیا پڕۆژەی دیار كر و سوپاسیا سەرۆكێ حوكمەتا هەرێما كوردستانێ كر و ئەو گرنگیا ب كەرتێ ئاڤەدانكرنێ بۆ هەموو كوردستانێ ددەت.
هەژی گۆتنێ یە پڕۆژە ژ لایێ كۆمپانیێن كاڤین گروپ و داڤەرست ب گوژمێ پتر ژ 13 ملیار دیناران دێ هێتە بجهئینان و بڕیارە د ماوێ 405 رۆژان دا بكەڤیتە د خزمەتا گشتی دا.
