بەرێ بنیاتی بۆ هەژمارەكا پڕۆژەیان ل سنوورێ دەڤەرداریا سێمێلێ هاتە دانان
بەردەوامیدان ب گەهاندنا پڕۆژەیێن خزمەتگوزاری بۆ هەموو دەڤەران ل سنوورێ پارێزگەها دهۆكێ، ل ژێر چاڤدێریا د. عەلی تەتەر، پارێزگارێ دهۆكێ و ب ئامادەبوونا د. نەوزاد عەبدوللا، بەرپرسێ لقێ ئێك یێ پارتی و خەلیل مەحمود، دەڤەردارێ سێمێلێ و رێڤەبەریێن پەیوەندیدار ل رۆژا 26/9/2024 بەرێ بنیاتی بۆ چێكرنا كۆمەكا پڕۆژەیان ل سنوورێ دەڤەرداریا سێمێلێ ب گوژمێ 10 ملیار و 676 ملیۆن دیناران هاتە دانان، ئەو ژی ئەڤەنە:-
1- بەرێ بنیاتی بۆ چێكرنا ئنتیكێ ئاڤا خانكێ و درێژكرنا ئنتیكێ پڕۆژەیێ ئاڤا ناوچەداریا فەیدیێ هاتە دانان.
2- بنیاتی بۆ چێكرنا رێكێن ناڤخوەیی ل گەل چێكرنا سۆلینان ل باژێرڤانیا مسێریكێ قووناغا دویێ هاتە دانان.
3- بەرێ بنیاتی بۆ چێكرنا ڤان پڕۆژەیان ل سەنتەرێ دەڤەرداریا سێمێلێ (چێكرنا پاركا گشتی، چێكرنا رێكێن ناڤخوەیی ل تاخێ شۆڕەش، چێكرنا سایدەكێ 30 متری ژ ترافیكا جاددەیا سەرەكی هەتا ترافیكا بنگەهێ لاوان، تمامكرنا سایدێ خزمەتگوزاری ژ ئەندەرپاسا سێمێلێ هەتا جاددەیا چاڤدێریا جڤاكی، سەخبێركرن و رێكخستنا جاددەیا سەرەكی یا سێمێلێ، سایدێ بلان بازار هەتا فلكا مسێریكێ) هەموو پڕۆژە ل سەر بودجا تایبەت یا پارێزگەها دهۆكێ ب گوژمێ 10 ملیار و 676 ملیۆن دیناران دێ هێنە ئەنجامدان.
پارێزگارێ دهۆكێ د كۆنگرەكێ رۆژنامەڤانی دا دوپاتكر، ل دووڤ راسپاردێن سەرۆكێ حوكمەتا هەرێما كوردستانێ پڕۆژە بۆ هەموو دەڤەرداری و ناوچەداری و گوندان ب یەكسانی دێ هێنە گەهاندن، ل چار سالێن دەربازبووی یێن كابینەیا نەهێ یا حوكمەتا هەرێما كوردستانێ پتری 950 پڕۆژەیان ب گوژمێ پتری 224 ملیار دیناران ل سنوورێ دەڤەرداریا سێمێلێ هاتینە ئەنجامدان.
