بەرێ بنیاتی بۆ هەژمارەكا پڕۆژەیێن خزمەتگوزاری ل شێخان هاتە دانان
ئەڤرۆ
ب چاڤدێریا د. عەلی تەتەر، پارێزگارێ دهۆكێ، ب گوژمێ چار ملیار و 757 ملیۆن دیناران بەرێ بنیاتی بۆ هەژمارەكا پڕۆژەیێن خزمەتگوزاری ل شێخان هاتە دانان.
ب مەرەما زێدەتر خزمەتكرنا وەلاتیان و بەردەوامیدان ب گەهاندنا پڕۆژەیێن خزمەتگوزاری بۆ هەموو دەڤەران، ل رۆژا 25/5/2023 و ب چاڤدێریا د. عەلی تەتەر، پارێزگارێ دهۆكێ و ب بەرهەڤبوونا سالح حەیدەر، بەپرسێ لقێ 20 یێ پارتی ل شێخان و دەڤەردارێ شێخان بەرێ بنیاتی بۆ هەژمارەكا پڕۆژەیێن خزمەتگوزاری هاتە دانان، كو ئەڤەنە:
1- بەرێ بنیاتی بۆ چێكرنا رێكێن ناڤخوەیی ل كۆمەلگەها چڕەی و سەنتەرێ ناوچەداریا قەسرۆكێ هاتە دانان.
2- بەرێ بنیاتی بۆ چێكرنا یاریگەهەكا وەرزشی یا 11 یاریكەری ل قەسرۆكێ و نووژەنكرنا هەردو بنگەهێن وەرزشی ل قەسرۆك و شێخان و نووژەنكرنا هولێن بیرەوەریان ل قەسرۆك و چڕەی و چێكرنا مەدەرەج و ژوورێن كارگێری یێن یاریگەها كەلەكچی و نووژەنكرنا بنگەهێ ساخلەمیێ ل قەسرۆكێ و پڕۆژێن ئاڤا گوندێن كوپێ و مەلا بروان و گرزەنگل و پڕۆژێ تۆڕێن ئاڤێ و عمبارا ئاڤێ ل قەسرۆكێ هاتە دانان.
3- بەرێ بنیاتی بۆ چێكرن و سەخبێركرنا رێكێن گوندێن (چەم ئەرزن و گرمیشان و دڕین)ێ وەكو قووناغا ئێكێ و قێركرنا رێكا گوندێ دەروێشان و گەرمك و چێكرنا رێكا گوندێن شێخ هەسن و مامئێزدینا و چڕە و دارەتۆ و كەلەكچی و گوندێ زیناڤا نوو و زیناڤا حاجۆ، بۆ قووناغا دویێ ژی رێكێن گرمیشان و دڕینێ دێ هێنە قێركرن هاتە دانان.
4- دانانا بەرێ بنیاتی بۆ كولانا بیرەكێ ل سنوورێ ناوچەداریا ئەترووش و دانانا تۆڕا ئاڤێ بۆ گوندێ بێبوزیێ و كۆلانا بیرەكا ئاڤێ بۆ گوندێ گڤارا و بەرفرەهكرنا تۆڕا ئاڤێ و كولانا سێ بیران ل سەنتەرێ شێخان و سەخبێركرنا یاریگەها گوندێ بلان و چێكرنا رێكێن گوندێن نێروەك – دەكان قووناغا ئێكێ، هەروەسا ل قووناغا دویێ رێكا گوندێ نێروەك دەكان ب درێاهیا پێنج كیلۆمەتران و 400 مەتران دێ هێتە چێكرن.
ل دۆر پڕۆژەیان پارێزگارێ دهۆكێ گۆت: «ئەو پڕۆژەیێن بەرێ بنیاتی بۆ هاتیە دانان ب گوژمێ پتر ژ چار ملیار و 757 ملیۆن دینارانە، هەموو پڕۆژەیێن سالا 2022ێ نە، كو هەتا نوكە ب رێژا 60 هەتا 70% هاتینە ئەنجامدان و كەفتینە د خزمەتا وەلاتیان دا».
دیسا ل هەمان رۆژ و ب بەرهەڤبوونا پارێزگارێ دهۆكێ پڕۆژەیێ چاندنا 40 هزار دارێن فێقی ب تایبەتی خوخا ئیتالی ل دەشتا مەمانێ هاتە ڤەكرن.
