بەرێ بنیاتی بۆ هەژمارەكا پڕۆژەیێن خزمەتگوزاری ل ئاكرێ هاتە دانان
د. عەلی تەتەر، پارێزگارێ دهۆكێ سەرەدانا دەڤەرداریا ئاكرێ كر و د چارچوڤێ ئەنجامدانا پڕۆژەیێن خزمەتگوزاری دا، بەرێ بنیاتی بۆ 11 پڕۆژەیێن خزمەتگوزاری ب گوژمێ سێ ملیار و 734 ملیۆن و 116 هزار و 750 دیناران دانا.
ژ وان پڕۆژەیێن بەرێ بنیاتی بۆ هاتیە دانان، سەخبێركرنا رێكا گوندێ گوندك ب درێژاهیا حەفت كیلۆمەتران، سەخبێركرنا رێكا گوندێ شەرمن ب درێژاهیا 800 مەتران، سەخبێركرنا رێكا گوندێ شوش ب درێژاهیا سێ كیلۆمەتر و 500 مەتران، پڕۆژێ سەخبێركرنا رێكا نهاڤا و سیتكا، چەمسماق، دوستان، خەلین ب درێژاهیا سێ كیلۆمەتر و 200 مەتران ل ناوچەداریا گردەسێن.
ل دۆر پڕۆژەیان پارێزگارێ دهۆكێ گۆت: «ل دووڤ راسپاردێن مەسرور بارزانی، سەرۆكێ حوكمەتا هەرێما كوردستانێ و پشتی جەنابێ وی سەرەدانا دەڤەرێن ئاكرێ و بەردەڕەش كری، بەردەوام پڕۆژەیێن خزمەتگوزاری بۆ خەلكێ دەڤەرێ دێ هێنە دابینكرن و د دەمەكێ نێزیك دا هەژمارەكا نوو یا پڕۆژەیان دێ هێنە راگەهاندن بۆ خزمەتكرنا وەلاتیێن دەڤەرێن ئاكرێ و بەردەڕەش».
