بەرێ بنیاتی بۆ 56 پڕۆژەیێن خزمەتگوزاری ل سنوورێ دەڤەرداریا بەردەڕەشێ هاتە دانان
بەردەوامیدان ب گەهاندنا پڕۆژەیێن خزمەتگوزاری بۆ هەموو دەڤەران، د. عەلی تەتەر، پارێزگارێ دهۆكێ ب ئامادەبوونا د. مەردان خدر، بەرپرسێ لقێ نەهێ پارتی ل ئاكرێ وئیسماعیل مستەفا، دەڤەردارێ بەردەڕەشێ و چەندین رێڤەبەرێن پەیوەندیدار دوهی 2/10/2024 پڕۆژەیێ چێكرنا رێكێن ناڤخوەیی ل گەل سۆلینان ل تاخێ پەككەوتوویان و و تمامكرنا جۆتسایدێ 40 مێتری قووناغا دویێ ل ناوچەداریا دارەتۆ ل دەڤەرداریا بەردەڕەشێ ڤەكر و بەرێ بنیاتی بۆ 56 پڕۆژەیێن جودا جودا ل سەنتەرێ دەڤەرداریا بەردەڕەشێ و ناوچەداری و گوند و كۆمەلگەهێن سەر ب وێڤە ب گوژمێ نەه ملیار و 439 ملیۆن دیناران دانا.
هەر د چارچوڤێ ڤێ سەرەدانێ دا پارێزگارێ دهۆكێ سەرا گوندێ قەرەناز دا و بڕیار دا، قوتابخانەیا گوندی بهێتە ئاڤاكرن.
د. عەلی تەتەر، پارێزگارێ دهۆكێ د كونگرەكێ رۆژنامەڤانی دا دیار كر، ل دووڤ راسپاردێن مەسرور بارزانی، سەرۆكێ حوكمەتا هەرێما كوردستانێ پڕۆژەیێن خزمەتگوزاری بەردەوام بۆ هەموو دەڤەران دێ هێنە دابینكرن و گۆت: «د چار سالێن بۆری دا 220 پڕۆژە ب گوژمێ 304 ملیار دیناران ل سنوورێ دەڤەرداریا بەردەڕەشێ هاتینە راگەهاندن و چێكرن».
پاش پارێزگارێ دهۆكێ و یێن د گەل دا سەرا پڕۆژەیێ ئاڤاكرنا هولا رەوشەنبیری ل سەنتەرێ دەڤەرداریا بەردەڕەشێ دا و ژ نێزیك سەحكرە قووناغێن ئاڤاكرنێ، هولا ناڤبری ل سەر راسپاردێن سەرۆك مەسعود بارزانی ب ڤوژمێ حەفت ملیار و 380 ملیۆن دیناران دهێتە بجهئینان و هەتا نوكە نێزیكی 20% هاتیە چێكرن.
دیسا هەر دوهی 2/10/2024 د. عەلی تەتەر، پارێزگارێ دهۆكێ سەرا دەڤەرداریا شێخان دا و ژ لایێ سەردار یەحیا، دەڤەردارێ شێخان ڤە پێشوازی لێ هاتە كرن و د هەڤدیتنەكێ دا بەحسێ پڕۆژەیێن حوكمەتا هەرێما كوردستانێ ل شێخان و پێدڤیێن خەلكێ دەڤەرێ ب پتر پڕۆژەیان هاتە كرن.
