بەرێ ل هەڕیێ دای
رەمەزان ئیسماعیل گەرەگوهی
گەلەك گۆتن و دەستەواژە ئەوێن بڤی ئاوایی دناڤ جڤاكێ مەدا د بەربەلاڤن و بۆ مەرەم و مەبەستێن جودا جودا بكاردهێن، ئەڤ گۆتنا ڤێ جارێ ژی ئەوا دبێژیت (بەرێ ل هەڕیێ دای) مە كریە مانشێتێ گۆتارا خوە كو ئێك ژ وان گۆتنایە.
تشتەكێ ڕۆن و ئاشكرایە كو هەر جڤاكەكی ل سەر ڕویێ ڤی ئەردی تایبەتمەندی و جوداهییا خوە ژلایێ ئابۆری و جڤاكی و رەوشەنبیری… و هتد دگەل جڤاكێن دی هەیە، دیسان هەر تاكەكێ جڤاكی ژی تایبەتمەندیێن خوە یێن جودا دگەل كەسانێن دی هەنە و ب چاڤەكێ جودا ژ خەلكێ دی دژیانێ دگەهیت و سەرەدریەكا دی گەل كەسێن دەردۆرا خوە دكەت، زێدەباری وێ چەندێ كو هەر كەسەكی ژی دڤێت جهەكێ تایبەت و ڕێزێ دناڤ كەس و كار و هەڤال و هۆگر و هەڤكارێن خوە دا هەبیت و هەموو كەس ڕێزێ لێ بگرن و بهایێ خوە هەبیت و هەموو كەس ب چاڤەكێ مەزن بەرێ خوە ب دەنێ، لێ ئەڤ چەندە ژی گرێدای هندەك سالۆخەت و رەفتار و گۆتن و كریارێن مرۆڤی یێن رۆژانەیە، ژ وان سالۆخەتان ژی پێدڤییە مرۆڤ دگەل هەموو كەسان یێ ڕاستگۆ بیت و هەردەم ئاخفتنێن مرۆڤی د لۆژیكی و د دورست و د بەرئاقل و جهێ باوەریا هەڤال و تێكەلێن مرۆڤی بن و دجهێ خوە دا بن، هەروەسا بەری باخڤیت هزرا خوە بكەت و پاشی باخڤیت و ئەو پەیڤێن ژ دەڤێ مرۆڤی دەردكەڤن نەبنە ئەگەرێن برینداركرنا هەستێ كەسانێن بەرانبەر و پەیدا كرنا ئاریشە و گرفتێن جڤاكی، بەرۆڤاژی دڤێت مفایێن باش و سەربۆر و شیرەتێن باش تێدا بن، نەخاسمە دڤێت ل ناڤ كومبوون و خڕڤەبوون و ل ڕوینشن و هەلكەفت و جڤاتاندا گەلەك ل دەڤێ خۆ هشیار بیت و گۆتنێن خوە باش ل سەڕاد و بێژینگان بكەت و هەموو دەما یێ ژێ پشتڕاست بیت و د سەرنجڕاكێش بن و پاشی دەربێخیت و بكاربینیت، ئەو كەسێ دگۆتنێن خوە دا یێ ب ڤی ئاوایی بیت، دێ بۆچوون و پێشنیارێن وی ب ساناهی ژلایێ خەلكێ دی ڤە هێنە گوهداریكرن و پەسەندكرن، لەوڕا پێدڤیە هەر ئاخفتنەكا ژ دەڤێ مرۆڤی دەردكەڤیت ب جوانی و باشی و ب موكۆمی و بنەجهی وەكی بەرێ ل هەڕیێ دای جهێ خوە بگریت.
