بەرێ چیای
جیلان شێخموس
ل بن سیبەرا چیایەکێ بلند، کو كۆپیتكا وی دناڤ مژ و مۆرانێ دا وندا ببوو، ئەز و باپیرێ خۆ روینشتبووین. دەستێن وی یێن زڤر، وەک بەرپەڕێن مێژوویەکا تەحل و پڕی ئازار دیار دکرن. وی ب دەنگەکێ نزم کو خەمەکا گران تێدا بوو، دەست ب ڤەگێڕانا چیڕۆکەکێ کر کو نە چیڕۆکا قوربانیبوونێ بوو، بەلکو چیڕۆکا قەهرەمانەکێ بوو کو وەكی چیا خۆ ل بەر سینگێ چ رەوش و ڕوودانا نە چماندییە.
باپیری بەرێ خۆ دا دویراتییێ و نقۆمی هزران بوو، گۆت: “ڕۆژێن ڕەش زوو هاتن، ڕۆلێ من… مە برچیبوون وەک سێبەر دگەل خۆ دگێڕا. ل سەر ڤان رێیێن بێ دوماهی، مە مریێن خۆ ب بێ کێل و کفن بنئاخ دكرن، ئەم ب هزاران کیلۆمەتران و ب پێخاسی ل سەر بەفرێ ب رێدكەتن.”
باپیری ب شانازی ڤە سەرێ خۆ بلند کر و درێژی دا ئاخفتنا خۆ: “لێ مە چ جاران سەرێ خۆ بۆ مرنێ نەچەماند.”
وی بەحسێ وێ ڕۆژێ دکر کو ل سەر سنووران، دایکان نانێ خۆ دکرە دو پارچە؛ نیڤەک بۆ زارۆکێ خۆ و نیڤا دی بۆ هەڤسۆیێن خۆ. د وێ ئێشێ دا، تشتەکێ مەزنتر ژ ژیانێ هەبوو. باپیری دگۆت: “ئێشا مە، ئەم کرینە مللەت؛ دەردێن مە، ئەم کرینە برا. ئەڤە ئەو نهینییا مەزن بوو کو دوژمن هەر تێدا نەگەهشتن.”
ئەو برینێن کو جاران خوین ژێ دهات، ئەڤرۆ ل سەر جەستەیێ مە بووینە نیشانێن شەڕی و بەردەوامبوونێ . من بەرێ خوەدا دەستێن باپیرێ خۆ و پاشان بەرێ خوەدا كۆپیتكا چیای، من هەست کر کو ئەم وەک “تەیرێ (فۆنیکس) ژ ناڤ خوەلی و ئاگری دووبارە ژ دایک بووینە ڤە. ئەو کچ و کوڕێن کو د ناڤ چادرێن ئاوارەییێ دا ژ دایک بوون، ئەڤرۆ ل زانکۆیان و تاقیگەهان دا ناڤێ کوردستانێ بلند دکەن. چیڕۆکا مە ژ گریێ دەستپێکر، لێ ئەڤرۆ ب کەنەکێ سەرکەفتنێ و پێشڤەچوونێ یا دهێتە نڤیسین.
باپیر بێدەنگ بوو، لێ چاڤێن وی دگۆتن: “ئەم یێن ل ڤێرێ و دێ هەر مینین.” ئەز ژی رابووم و من قەلەمێ خۆ گرت دا ڤێ چیڕۆکێ بنڤیسم؛ نە ژبۆ وێ چەندێ خەمێن خۆ نیشا بدەم، بەلکو دا بێژم کو ئیرادا کوردایەتیێ ژ هەمی ئازاران مەزنتر بوو.
نزانم بۆچی من هەست كر كو پێنوسی ژی وەكی من هەست ب سەربلندییێ كر و شوینا حوبرێ وی بوو رۆناهی.
