بەغدا كار بۆ راكێشانا وەبەرهێنەرێن كوردستانێ دكەت
هەولێر، قائید میرۆ
پەیڤدارێ ئێكەتیا وەبەرهێنەرێن كوردستانێ ئاماژەكر، د كۆمبوونا وەبەرهێنەران دگەل سەرۆكێ حوكمەتا هەرێما كوردستانێ بڕیار هاتیەدان پشتەڤانیا زێدەتر یا كەرتێ وەبەرهێنانێ بهێتەكرن و بڕیارە ل ئایندەیەكێ نێزیك كۆنگرەیەك ل دۆر رەوشا وەبەرهێنانێ ل دهۆكێ بهێتە ئەنجامدان بۆ چارەسەركرنا ئاریشەیێن كەرتێ وەبەرهێنانێ ل دهۆكێ.
مەلا یاسین، پەیڤدارێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیار كر» ل چەند رۆژێن بۆری كۆمبوونەك دناڤبەرا وەبەرهێنەر و سەرۆكێ حوكمەتا هەرێما كوردستانێ بڕێڤەچوو تێدا ب هووری بە مە داخوازی و گازندەیێن خوە گەهاندنە سەرۆكێ حوكمەتا هەرێمێ ب خۆشحالیڤە سەرۆكێ حوكمەتێ گوهداریا هەموو داخوازیێن وەبەرهێنەران كر و هەر پشتی كۆمبوونا دگەل وەبەرهێنەرا ئەنجوومەنی وەبەرهێنانێ ژی كۆمبوو تێدا چەند بڕیارەك هاتنە دەركرن.
زێدەتر دبێژیت: ب تایبەتی بڕیارە گرنگیەكا زۆرتر ب ڤان دەڤەران بهێتەدان یێن بەری نوكە كەرتێ وەبەرهێنانێ تێدا گەشە نەكریە، واتە ب تنێ چەند پڕۆژەكێن كێم یێن وەبەرهێنانێ تێدا هاتینە بجهئینان، ب تایبەتی گرنگیەكا تایبەت دێ ب قەزا و ناحیا و ئیدارەیێن سەربخۆ هێتەدان، هەر وەبەرهێنەرەكێ ل دەرڤەی باژێڕێن مەزن پڕۆژێن وەبەرهێنانێ ئەنجامبدەت، ئەڤە دێ ئەردێ پڕۆژەی ل سەر بهێتە تاپۆكرن، بەرۆڤاژی هەمان پڕۆژە ل سەنتەرێ باژێڕێ مەزن بهێتە ئەنجامدان دێ ئەرد وەكی موستاتەحە بدەنە وەبەرهێنەری نەك تاپۆ.
پەیڤدارێ ئێكەتیا وەبەرهێنەران گۆت «ل دەستپێكێ دێ هندەك بڕیار ل دۆر پارێزگەها هەلەبجە بهێنە دەركرن و ل دووڤدا بۆ هەمان بڕیار بۆ پارێزگەهێن دیژی دێ بهێنە دەركرن، ب تایبەتی بۆ ئیدارەیێن سەربخۆ، لەوڕا دهێتە چاڤەڕێكرن چەند بڕیارەك ل دۆر كەرتێ وەبەرهێنانێ بۆ پارێزگەها دهۆكێ و ئیدارەیا سەربخۆیا زاخۆ ژی بهێنە دەركرن، چونكە هەموو بزاڤەك بۆ چارەسەركرنا ئاریشەیێن كەرتێ وەبەرهێنانێ دهێنەدان، سەرۆكێ حوكمەتێ زۆر یێ داغبارە بۆ ڤێ چەندێ گرنگیەكا زۆر ب كەرتێ وەبەرهێنانێ بهێتەدان و ئاسانكاریێن زۆر بۆ كەرتێ وەبەرهێنانێ بهێنەكرن، بڕیارە ل پارێزگەها دهۆكێ كۆنگرەیەك ل دۆر رەوشا وەبەرهێنانێ بهێتە ئەنجامدان و كۆنگرە دێ تایبەت بیت ب ئاریشەیێن كەرتێ وەبەرهێنانێ ل پارێزگەها دهۆكێ و چاوانیا گەشەپێدانا كەرتێ وەبەرهێنانێ ل دهۆكێ.
مەلا یاسین ئاماژەكر» بەغدا یا كار دكەت بۆ لاوازكرنا هەرێما كوردستانێ و ئێك ژ وان خالێن كار ل سەر دهێتەكرن راكێشانا وەبەرهێنەرێن هەرێما كوردستانێ یە بۆ دەڤەرێن دی یێن عێراقێ، ئەم ژی دێ كار كەین بۆ بەرهنگاربوونا وان پیلان و دژایەتیێن ل سەر هەرێما كوردستانێ و هەموو بزاڤەكێ دێ كەین وەبەرهێنەرێن مە نەچنە دەڤەرێن باشوور و ناڤەڕاستێ عێراقێ، بەرۆڤاژی دێ كار كەین وەبەرهێنەرێن دەڤەرێن دی ژی بهێنە كوردستانێ».
خویاژی كر، هەتا وەبەرهێنەرێن بیانی ژی زێدەتر بهێنە هەرێما كوردستانێ بۆ ئەنجامدانا پڕۆژەیێن وەبەرهێنانێ و پشكداریێ د ئاڤاكرنا هەرێما كوردستانێ دا بكەن، وەبەرهێنەر ژی دگەل حوكمەتا هەرێما كوردستانێ دێ بەرهنگاری هەموو پیلانەكێ بن و دڤێت ئەم خوە بۆ قۆناغێن داهاتی خوە بەرهەڤ بكەین، ژ بەر كو مەترسی و پیلان یێ دهێنەگێڕان ل سەر هەرێما كوردستانێ و پێدڤی ب هاریكاریا هەموو لایەكی هەیە.
