بەلگێن زەر
سوسمان عومەر ئەحمەد
د ڕۆژەكا پاییزێ دا و دگەل هاتنا بایەكێ بهێز، من دڤیا پەیاسەیەكێ بۆ ناڤ کۆلانێن باژێری بکەم، دەما ژ مال دەركەفتیم من ل بەراهییا خوە تەماشەکر، چاڤێن من ب باخچەیەکێ مەزن کەفت، دناڤ باخچەی دا گۆلێن زەر و دارەكا بەلگێن ئەوێ زەر سەڕنجا من ب خوە ڕاکێشا، ڕهێن ئەوێ دارێ دناڤ ئەردی دا چووبوونە خوارێ، ئەز ل دەڤ ڕاوەستییام و من دزانی ئازارا ئەو یا ماندی کری، من ژی گۆتێ: دارێ بەلگێن زەر یێن ژ تە دكەڤن! ب گڕنژینەكا سڤك بەرسڤا من دا و گۆت: خاتین زێرین، هاڤینێ خاترا خوە ژ من خاست و پاییزێ جلوبەرگێن زەر کرنە بەر من، بەلگێن من ژبلی وەرینێ چ چارەیێن دی نینن، دەمێ دبینیت ئەڤینا بەلگەکا نوی یا د دلێ من دا! دەم هات ئەز ژی هێدی هێدی به‌لگێن خوە ب وەرینم و چاڤه‌ڕێ نویبوونێ ببم، ئەڤ وەرینە خۆزی و بیرهاتن و خەم و نەخوەشینە یێن د ناخێ من دا و ئاگر یێ بەربوویێ.. ئەڤجا ئاگری بەلگێن من یێن زەر كرین. خاتینا زێرین، ده‌م هات تو ژی وەكی من ده‌ستا ژ یا بۆری بهردی و خه‌مێن خوە ب وه‌رینی، ناخێ و مێشكێ خوە ڤاله‌كه‌ی ژ هه‌ر تشته‌كێ نه هه‌ژی وەك: هزر و بیرێن نه‌رێنی و بێهیڤیبوونێ.. هەروەسا دڤێت تو ده‌ستا ژ كه‌سایه‌تییا خوە یا كه‌ڤن بهردی و كه‌سایەتییه‌كا نووی ئاڤا بكه‌ی و ده‌ست ب گوهۆڕینێ بكه‌ی.
د دەمەکێ دا، بایەکێ فێنک خاتین زێرین هەمبێز کر و ڕۆینشتە ل ژێر سیبەرا خەمێن دارێ، بەلگێن زەر گاڤ بۆ گاڤێ د وەریان و باخچە ب ڕەنگێ زەر هاتبوو خەملاندن، دناخێ خوەدا گۆتە دارێ: پاییز ب گۆهوڕینان یا جوانه، هه‌روه‌كی جوانییا ڕه‌نگێن بەلگێن تە (قەهوای، سۆر، زەر) یا سه‌رنجڕاكێشه هه‌روه‌كی سه‌رنجڕاكێشییا دیمه‌نێ من. سروشت یێ جوانه ب هه‌ر چوار وه‌رزێن خوەڤە، هه‌ر وه‌رزه‌كێ نامەیە‌كا جوان یا تێدا، دارێ گۆت: بەلێ، خاتینا زێرین، ئەڤە نامەیا پاییزێیە بۆ مه، ئەوێ دڤێت ئه‌وێ چه‌ندێ بگه‌هینیت مە كا چاوان سالێ وه‌رزه‌ك هه‌یه تێدا ئەز بەلگێن خوە د وه‌رینم، ژیانا تە ژی دڤێت پاییزه‌ك تێدا هه‌بیت دا خوە ژ یا بۆری ڕزگار بكه‌ی. د ئەڤی باژێری دا خەمێن دلی ژ لێدانێن دلی پترن.. یێن هەین خەمێن خوە ب ڕۆندکا د ڤەڕەڤینن و یێن هەین وەکی من دگەل بای و باڕۆڤان بەلگێن خەمێن خوە بۆ سروشتی دوەرینیت، ئەز ئاشقا سروشتی مه و دیمه‌نێن ئەوێ من دلخوەش دكه‌ن و هه‌سته‌كێ سه‌یر ب من د به‌خشن، نه یا نه‌چارم ئەڤێ جوانییا چاڤێن من دبینن، ب هزرێن نه‌رێنی ب گوهۆڕم.
