بەلێ بۆ مانا كاپتن سلێمانی
ئیحسان حەسەن
رەنگە هەر ئێك ژ مە وەكو چاڤدێر و شرۆڤەكارێن فوتبۆلێ، بوچوونێن خوە یێن تایبەت هەبن، كا چەوا راهێنەرێ یانەیا دهۆك كورێ پارێزگەهێ كاپتن سلێمان رەمەزان شیا ددەمەكێ هەستیاردا تیمێ د رەوشەكا نەباش دا وەرگریت، هەر زوو گوهۆرینێ دشێواز و پلانێن تیمێ دا بكەت و بەرەب سەركەڤتنان و ئێكەم ناسناڤێ دیرۆكی یێ كۆپا ئیراقێ ببەت، ئەز دبێژم ئەڤ چەندە ڤەدگەریێتە چەند هۆكاران یا ئێكی َو سەرەكی، شارەزاهییا وی یا چەندین سالان لدۆر چاوایەتییا رەفتارێ دگەل رەوشێن یاریان ئەگەر چەند ب بزحمەت ژی بن، یا دویێ خواندنا وی یا دروست بۆ تیمێن هەڤرك و دەرئێخستنا یاریزانان ژ رەوشا دەرونی یا وان ئەنجامێن خراب و دانا باوەریێ ب وان كو دێ شێن سەركەڤتنێ لسەر وان تیما تۆماركرن، ئەوێن بەری نها و ژبەر هەر ئەگەرەكی ئەنجام دبەرژوەندییا خوەدا ئێكلاكرین، شوون تبلێن وی ب ئاشكرایی ددیدارێن قۆناغا چارێك و پێش دویماهییێ دگەل هەر ئێك ژ یانەیێن مینا و جەوییە هاتنە پێش، یا سێیێ ڤەگەراندنا گیانێ تیمێ، شیانێن وی ژبۆ بەرهەڤكرنا یاریزانێن یەدەك بۆ ناڤ سەقایی یاریان ب زاخەكا بلند و دانا دەلیڤەیێ بۆ وان كو هەموو شیانێن خوە بێخنە دخزمەتا تیمێ دا ژبۆ بجهئینانا پلانێن وی یێن تەكتیكی لدووڤ پێدڤییا تیمێ، یا چارێ باوەری و پشتەڤانییا كارگێریێ و جەماوەرێ یانەیێ ب شیانێن وی ئەگەرەكێ دی بوو، ژبەر كو كاپتن سلێمان نە یێ دوور بوو ژ یانەیێ، هەر ئەو بوو دگەل هژمارەكا ڤان یاریزانان شیابوون تیمێ پشتی چەندین سالێن ڤەقەتیانێ ژ خولا مەزنان ڤەگەرینە خولا نایابا ئیراقێ، یا پێنجێ و ژهەمیا گرنكتر ئەوە، سلێمانی بخوە هەموو فاكتەرێن سەركەڤتنێ لدەف هەنە، چ وەكو باوەرنامەیا وی یا راهێنانێ یابلند، ژبلی كەسایەتییا وی یا بهێز و رەوشەنبیریا وی یا مەزن دفوتبۆلێ دا، دیسان رەوشتێ وی یێ بەرز دناڤا یاریگەهێ دا هەروەسا ژ دەرڤە، هەر ئەڤە نە فاكتەرێن سەركەڤتنا هەر راهێنەرەكی، یا من دڤێت بێژم كاپتن سلێمان روویەكێ وەرزشێ یێ بهایە ژهەژی پتر رێزگرتنێ یە، ئەز نوزانم كا نها كارگێریا یانەیا دهۆك هزرا چ دكەت، لێ ئەز باش دزانم كو هەر بریارەكا بهێتە دان، یان هزركرن تێدا هەبیت كو دەستان ژڤی راهێنەری بەردەن، ئەز دبێژم ئەڤ بریارە دگەل رێزێن من بۆ كارێ وان دێ یا شاش بیت ب تایبەت دڤی ماوەی دا، ژبەركو پشتی دەمەكێ نێزیك تیم دێ كەڤیتە د هەڤركیێن كۆپا سوپەرا ئیراقێ دا، نها پتر ژ هەر دەمەكی پێدڤی ب جیگیركرنێ یە نەك گوهورینێ، ئەگەر هەبن ژی پێدڤییە دیاریزانان دا بهێتە كرن، ژبەر كو كاپتن سلێمان راهێنەرەكێ ژێهاتی وەێرەكە، شیانێن هەین دسەركێشیا تیمێ دا یێ بەردەوام بیت، لەوما پێدڤییە هەموو لایەك ل پشت وی ب راوەستن ب تایبەت ئەو كەس یێن كو بریار د دەستێ واندا، بۆ هندێ پتر پشتەڤانییێ و هاندانا وی بكەن، داكو بشێت وان هەموو هیڤییان بجهبینیت یێن كو هوون خەباتێ بۆ دكەن، لەوما دێ بێژن بەلێ بۆ مانا سلێمانی.
