بەناڤ ئەحمەد: وەرزەكێ ب هێزە و هەڤڕكی بۆ ناسناڤێ كوردستانێ یا دژوارە
عەلی حاجی:
چاڤەڕێ دهێتە كرن ئەڤرۆ تیما فوتبۆلا یانەیا زاخۆ یارییا خوە ژ گەڕا 17ێ یا خولا پلا نایابا كوردستانێ ژ دەرڤەیی یاریگەها خوە دا بەرانبەر یانەیا ڕانیە ئەنجامبدەت و چاڤ ل سەڕكەفتنێ و پێشڤەچوونێ یە بۆ سەرێ لیستێ.
تیما زاخۆ خودانا 27 خالانە ژ حەفت سەركەفتن، شەش وەكهەڤییان ب تنێ دو خوسارەتی هەنە ل رێزا سێیێ دهێت، بەری دەستپێكرنا یاریێن گەڕا 17ێ شێروانە ب30 خالان سەرێ لیستێ دهێت، پێشمەرگەیا هەولێر ب29 خالان رێزا دویێ دهێت، هەر ئێك ژ ڕزگاری ب25 خالان، ئاكرێ ب25 خالان، هەولێر ب20 خالان رێزێن چارێ هەتا شەشێ ل دووڤ ئێك دهێن.
د داخویانیەكێ دا بەناف ئەحمەد ڕاهێنەرێ تیما یانەیا زاخۆ بۆ رۆژنامەیا ئەڤرۆ گۆت: وەرزێ ئەڤ سالە یێ خولا پلا نایابا كوردستانێ گەلەك ب هێزترە ژ وەرزێن بۆری و هەتا نوكە زێدەتری چار یانە هەڤڕكیێ بۆ ڕێزێن ئێكێ دكەن، ئەڤە ژی وێ چەندێ دگەهینیت كو شەڕێ هەتا دووماهییا خولێ بۆ ناسناڤی دێ بەردەوام بیت، بۆ هەر یارییەكێ كە باشترین شێوە خوە بەرهەڤ كرینە و یا دشیان دا بیت نا هێلین خالان ژ دەست بدەین، تیما مە ل سەر ڕێكەكا دروست د چیت.
هەروەسان ناڤهاتی گۆت: پشتی ئینانا كۆمەكا یاریزانان لێك تێگەهشتنەكا باش دنڤابەرا یاریزانێن مە دا پەیدابوویە و یاری بۆ یاری ژی باشتر دبیت كو دبیتە بەلگە، تیما مە پێدڤی ب پشتەڤانییا باشتر هەیە كو دێ بیتە دەرگەهەك بشێن بۆ قۆناغێن دووڤدا باشتر بن و دەربازبین، من باوەری ب شیانێن یاریزانێن خوە و گەشبینن دێ ئاست و ئەنجامێن دلخوەشكەر هەبن.
بۆ زانین یانەیا زاخۆ هەر ئێك ژ مونتەزەر محەمەد عەلی، لاس كەنعان عەدنان، ئیسماعیل ئەنەس سەدیق، شەوكەت ئەدیب محەمەد و ئیبراهیم فەرسەت بۆ ڤەگۆهاستنێن زڤستانێ و یاریێن مایی یێن خولێ ل سەر تیما خوە زێدەكربوون.
