بەنكا چاندنێ بۆ پشتەڤانییا جۆتیارێن شنگالێ و ئەلقۆشێ دێ هێتە ڤەكرن
دهۆك، دلۆڤان ئاكرەیی:
پەیڤدارا فراكسیۆنا پارتی ل پەرلەمانێ ئیراقێ دیاركر، پشتی ئەو ل گەل وەزیرێ چاندنێ یێ حوكمەتا فیدڕال كۆمبووین، ڕازیبوون هاتیە نیشادان بۆ بجهئینانا داخوازیێن سەرەكی یێن جۆتیاران ل دەڤەرداریا شنگالێ و ناوچەداریێن سنوونێ و گرعزێرێ، دیسا ناوچەداریا ئەلقۆشێ یا سەر ب دەڤەرداریا تلكێفێ ڤە.
د. ڤیان دەخیل، ئەنداما پەرلەمانێ ئیراقێ و پەیڤدارا فراكسیۆنا پارتی ل جڤاتا نوونەرێن ئیراقێ بۆ رۆژنامەیا ئەڤرۆ گۆت: «رازیبوون ل سەر لێخۆشبوونا كرێیا ئەردی بۆ جۆتیاران بۆ سالێن 2021 هەتا 2025 هاتیە كرن، دیسا ئەڤ پلانا چاندنێ دێ ناحیا ئەلقۆش و گوندێن سەر ب وێ ڤە بخۆڤە گریت، دیسا وەزیرێ چاندنێ ڕازیبوون ل سەر دووبارە ڤەكرنا بەنكا چاندنێ ل شنگالێ دا، كو جۆتیار بشێن مفای ژ قەڕێن چاندنێ وەربگرن و پڕۆژەیێن خۆ پێشڤەببەن».
گۆتژی: «ئەڤ پێنگاڤە د چارچوڤێ پشتەڤانیكرنا جۆتیاران دایە، بۆ هندێ بەردەوامیێ ب كارێ خۆ بدەن و ڕەوشا وان باشتر ببیت».
