بەهدینان ژی دێ پشكداریێ د بیرەوەریا كیمیابارانكرنا هەلەبجە دا كەت
هەولێر، قائید میرۆ:
دەڤەردارا هەلەبجە دیاركر، بەرهەڤی بۆ رێوڕەسمێن كارەساتا كیمیابارانكرنا هەلەبجە هاتینە كرن و دبێژیت: ل رۆژا 16ی ئادارێ دێ خرڤەبوونەكا بەرفرەه و مەزن بڕێڤەچیت و ل بەهدینان ژی كەسوكارێن قوربانیێن ئەنفالا بەهدینان دێ پشكداریەكا كارا هەبیت.
نوخشە ناسح، دەڤەردارا هەلەبجە بۆ رۆژناما ئەڤرۆ دیاركر، بەرهەڤی بۆ ساخكرنا بیرەوەریا كارەساتا كیمیابارانكرنا باژێڕێ هەلەبجە هاتینە كرن، ئەڤا ل 16ی ئادارا سالا 1988ێ ژ لایێ رژێما بەعس هەمبەر وەلاتیێن سڤیل یێن باژێڕێ هەلەبجە هاتیە ئەنجامدان، ئەڤ سالە خرڤەبوونەكا مەزن یا جەماوەری دێ هێتە برێڤەبرن، هەروەسا دێ ل سەر ئاستێن جودا پشكداری هەبیت.
نوخشە ناسح گۆت:»ئەڤ سالە دێ كەسوكارێن قوربانیان ل سەر ئاستێ هەرێما كوردستانێ پشكداریێ د مەراسیما كارەساتا كیمیابارانكرنا هەلەبجە دا كەن ژ وان ژی، كەسوكارێن بارزانیان و ئەنفالێن گەرمیان و كەسوكارێن ئەنفالێن بەهدینان ژی دێ پشكداریەكا كارا هەبیت، لەوڕا پێشبینی دكەین ئەڤ سالە بیرەوەریا كارەساتا هەلەبجە ژ سالێن بۆری جودابیت».
