ب ئامادەبوونا نوونەرێ سەرۆك مەسعود بارزانی پەردە ل سەر پەیكەرێ شەهید وەیسی بانی هاتە لادان
ب ئامادەبوونا سیداد بارزانی، نوونەرێ سەرۆك «مەسعود بارزانی» و فازل میرانی، بەرپرسێ دەستەیا كارگێری یا مەكتەبا سیاسی یا پارتی دیموكراتی كوردستان و چەند ئەندامێن مەكتەبا سیاسی و ئەندامێن كۆمیتا ناڤین و د. عەلی تەتەر، پارێزگارێ دهۆكێ و چەندین بەرپرسێن حزبی و ئیداری و لەشكری و جەماوەرێ دەڤەرێ، دوهی 20/10/2025 و د رێورەسمەكێ ژ هەژی دا ل سەر جادەیا گشتی ل دووڕیانا شێخان بۆ پەرسگەها لالشێ پەردە ل سەر پەیكەرێ شەهید وەیسی بانی هاتەلادان.
ل بەراهیێ پەیڤا ب خێرهاتنێ ژ لایێ سەباح بەیتولا، هاریكارێ بەرپرسێ مەكتەبا رێكخستنا پارتی ل پارێزگەها دهۆكێ هاتە خواندن و رۆلێ شهید وەیسی بانی د بزاڤا رزگاریخوازا كوردستانێ دا بەرچاڤكر.
پاش سیداد بارزانی، نوونەرێ سەرۆك بارزانی پەیڤەك پێشكێشكر و رۆلێ شەهید وەیسی بانی د شەڕ و داستانێن شۆڕەشێن ئیلۆن و گولانێ دا بلند هەلسەنگاند و گۆت: «قارەمانی و مێرانیا شەهید وەیسی بانی وەكربوو، كو ببیتە جهێ باوەریا سەركردایەتیا شۆڕەشێ».
سیداد بارزانی گۆتژی: «دانانا پەیكەرەكی بۆ شەهید وەیسی كێمترین وەفاداریە هەمبەر خەبات و تێكۆشینا شەهیدی و دوپاتكر ئەڤ ئازادی و دەستكەفتێن ئەڤرۆ مە هەین هەموو بەرهەمێ خەبات و قوربانیدانا شەهیدی و هەموو شەهیدێن كوردستانێ یە».
دیسا فلمەكێ دكیۆمەنتاری ل دۆر ژیانا شەهید وەیسی بانی هاتە بەرچاڤكرن.
ل دوماهیێ عەزیز وەیسی بانی، فەرماندێ فەرماندەیا زێرەڤانیێ بناڤێ بنەمالا خۆ سوپاسیا سەرۆك مسعود بارزانی و نوونەرێ جەنابێ وان سیداد بارزانی و هەموو بەرهەڤبوویان د رێورەسمان دا كر.
شەهید وەیسی بانی ل شەڤا 18ل سەر 19 مەها چریا ئێكێ سالا 1978 ل گوندێ نسرا شەهید بوویە.
