ب ئامادەبوونا پارێزگارێ دهۆكێ پێشانگەها پڕۆژەیێن قوتابیێن كولیژا چاندنێ هاتە ڤەكـرن
ب ئامادەبوونا د. عەلی تەتەر، پارێزگارێ دهۆكێ و جێگرا قونسلێ گشتی یێ وەلاتێ هۆلەندا و سەرۆكێ زانكۆیا دهۆكێ، رێكخروا ڤنگ یا هۆلەندی ب هەڤكاری و هەماهەنگیا دەڤەرداریا دهۆكێ و ژوورا بازرگانی و پیشەسازیا دهۆكێ و زانكۆیا دهۆك دوهی 12/5/2025 پێشانگەهەك ڤەكر كو تێدا كۆمەكا قوتابیێن دەرچوویێن زانكۆیا دهۆك یێن كۆلیژا چاندنێ بەهرەیێن پڕۆژەیێن خۆ د بیاڤێ چاندنێ و بەرهەمێن چاندنێ دا نیشادان.
پارێزگارێ دهۆكێ د پەیڤەكێ دا گۆت: «پێدڤیە بەردەوام گرنگی ب چاندنا دەرامەت و داروبارێن دەڤەرێ و بەرهەمێن ناڤخۆیی بهێتەدان و مفا ژ ئەرد و ئاڤ و سەقا و سروشتێ جوانێ دەڤەرێ بهێتە وەرگرتن، پشتەڤانیا حكومەتا هەرێما كوردستانێ ژی بۆ هەر هاریكاریەكێ دوپات دكەین، دیسا سوپاسیا حكومەتا هۆلەندا دكەین، كو بەدەوام د ڤی بیاڤی دا پشتەڤان بوویە».
ژ لایێ خۆڤە د. داود سلێمان، سەرۆكێ زانكۆیا دهۆك و شوكری جەمیل، سەرۆكێ ژوورا بازرگانی و پیشەسازیا دهۆك و خانم رەوشەن ئەترووشی، رێڤەبەرا رێكخراواڤنگ دیاركرن كو دەمەكێ درێژ ب مەرەما نیشادانا شیانێن گەنجان د بیاڤێ چاندنێ دا، كار د بەرهەڤكرنا ڤێ پێشانگەهێ دا هاتیە كرن و خواست ئەڤ هزرە ببنە پڕۆژە و بكەڤنە د خزمەتا گشتی دا.
پاشی جێگرا قونسلێ گشتی یێ هۆلەندا بەحسێ پەیوەندین د ناڤبەرا وەلاتێ هۆلەندا و هەرێما كوردستانێ دا د بیاڤێن جودا دا و ب تایبەتی د كەرتێ چاندنێ دا و هەماهەنگیا راستەخۆ یا ل گەل ئیدارا پارێزگەها دهۆكێ كر و ل دوماهیێ گەڕیانەك د ناڤ پێشانگەهێ دا هاتە كرن.
