ب بریارا لژنا به‌رهنگاربوونا كورونایێ 1200 مامۆستا ل دهۆك ئه‌ف ساله ده‌وام نه‌كر
ل دووف بریارا لژنا به‌رهنگاربوونا كورونایێ ل هه‌رێما كوردستانێ كو ده‌رگه‌هێن گشت باغچێن زارۆیان بۆ سالا خواندنێ 2020- 2021 نه‌هاتنه‌ڤه‌كرن، نێزیكی 1200 مامۆستا ئه‌ف ساله ل دهۆكێ ده‌وام نه‌كرن.
ناهیدا دۆسكی، جێگرا رێڤه‌به‌رێ سه‌رپه‌رشتێ په‌روه‌رده‌ی ل رێڤه‌به‌ریا سه‌رپه‌رشتیاری ل په‌روه‌ردا گشتی یا پارێزگه‌ها دهۆك بۆ رۆژناما ئه‌ڤرۆ ئاشكراكر كو پشتی ب بریارا لژنا به‌رهنگاربوونا كورونایێ ده‌رگه‌هێن باغچێن زارۆیان هاتینه‌گرتن بۆ سالا خواندنێ 2020 – 2021 ده‌رگه‌هێن 61 باغچێن حوكمی 14 باغچێن نه‌حوكمی ل پارێزگه‌ها دهۆكێ هاتینه گرتن و دناڤا ئه‌ڤان باغچان دا نێزیكی 1200 مامۆستا تێدا ده‌وامدكر و ئه‌ف ساله هه‌ر هه‌می مامۆستا ل مال بوون.
ناهیدایێ ئه‌و ژی دیاركر كو گشت قوناغێن خواندنێ زیان ڤێ كه‌فتیه ژ ئه‌گه‌رێ ئه‌ڤان روودانێن نه‌چاڤه‌رێكری كو كاودانێن گشت وه‌لاتان هاتینه تێكدان و زیان ب باغچان ژی كه‌فتیه و ئه‌ڤ قوناغه گه‌له‌ك یا گرنگه بۆ گه‌شه‌پێدانا لایه‌نێ جودا كو دبنه بناغه‌كێ بهێز بۆ گه‌شه‌پێدانا هه‌مه لایه‌نێ كه‌سایه‌تیا زارۆكی ب درێژاهی یا كه‌سایه‌تی یا وی یا فێربوونێ كومه‌لایه‌تی و جه‌سه‌تیی و ده‌روونی و ئه‌ف قوناغه دبیته ده‌سپێكك بۆ فێربوونا بنه‌مایێن خواندنێ و نڤێسینێ كو دبنه بنیاته‌كێ فێربوونێ بۆ قوناغا بنه‌ره‌تی و قوناغا باغچان قوناغه‌كا راستڤه‌كرن و ئاراسته‌كرنێ یه ژ بۆ ره‌فتارێن نه دروست و نه ساخله‌م و هاندنا وان ل سه‌ر چه‌وانیا وان بۆ خوه ئاڤاكرنێ و گه‌له‌ك بزاڤێ، دی بخوه‌ڤه دگریت و زارۆكێن باغچان ئه‌ف ساله ژ هه‌ر بزاڤه‌كێ هاته بێ به‌هركرن.
ناڤبریێ ئه‌و ژی گۆت: ل دووف بریار و رێنمایێن وه‌زاره‌تا په‌روه‌ردێ بۆ ماوه‌كی باغچێن ئه‌هلی ده‌وام كر، لێ ژ به‌ر تێكچوونا ره‌وشا ساخله‌میێ ل هه‌رێما كوردستانێ بریارا داخستنا ئه‌وان باغچان ژی هاته‌دان و هه‌تا ئه‌ڤرۆ ئه‌و باغچه‌ی گرتی ماینه، نه‌شێن قوناغا باغچان بكه‌ینه سێ رۆژ ب سێ رۆژ چنكو نه قوناغه‌كا ئیلزامی یه به‌لكو قوناغا بنه‌ره‌تی یا ئیلزامی یه و یا پێكڤه گرێدایه و دڤێت زارۆك بچیته قوتابخانێ و به‌رده‌وامیێ بده‌ته خواندنا خوه و دیسا ژیێ زارۆكێن باغچه‌ی گه‌له‌كێ هه‌ستیاره و شیانێن خوه پاراستنێ نین و بۆ پاراستنا گیانێ ئه‌ڤان زارۆكان به‌رده‌وامی ب گرتنا ده‌رگه‌هێن باغچان هاته‌دان.
ناهیدا دۆسكی ئه‌و ژی گۆت: مامۆستایێن باغچان مولكێ وه‌زاره‌تا په‌روه‌ردێ نه و هه‌ر بریاره‌كێ ل سه‌ر ده‌وامكرنا ئه‌وان مامۆستا بدن وه‌ك لایه‌نێ جێبه‌جێكار دێ بجهئینین ،لێ ب بۆچوونا من مفا ژ ئه‌ڤان مامۆستا ناهێتـه وه‌رگرتن بۆ قوناغێن بنه‌ره‌ت چنكو پتریا په‌روه‌ردێن مه گه‌له‌ك مامۆستایێن بنه‌ره‌ت هه‌نه و دیسا گه‌له‌ك مامۆستایێن باغچان تایبه‌ته مه‌ندیا باغچان وه‌رگرتیه، بتنێ بۆ په‌روه‌ردێن ده‌وروبه‌ران دشێن مفای ژ شیانێن ئه‌ڤان مامۆستا وه‌ربگرن و تایبه‌ت بۆ بازنێ ئێكێ قوناغا بنه‌ره‌ت.
ناهیدا ئه‌و ژی گۆت: هه‌كه بۆ سالا داهاتی كاودانێن ساخله‌میێ به‌ر ب باشیێ ڤه چوون بێ گومان وه‌ك قوناغێن خواندنێ دێ ده‌رگه‌هێن باغچان ژی هێنه‌ڤه‌كرن و هه‌كه مه‌ترسی یا به‌رده‌وام بوو گومان نینه گیانێ زارۆكان دێ گرنكتر بیت ژ ڤه‌كرنا ده‌رگه‌هێن باغچان و دێ چاڤه‌رێ هه‌ر بریاره‌كا وه‌زاره‌تا په‌روه‌ردێ بین ل سه‌ر وی بابه‌تی.
