ب بهایێ چوار ملیار دیناران رێ و جادە ل ناحیا سەرسنکێ هاتینە چێکرن
، دلۆڤان ئاکرەیی
رێڤەبەرێ ناحیا سەرسنکێ دیار کر:
پارک و سیلاڤەک دناڤ سەنتەرێ ناحیا سەرسنکێ دا دهێنە چێکرن و رازەمەندی ب سەر چێکرنا رێکا دناڤبەرا ناحیا سەرسنکێ بۆ دێرەلوکێ هاتیە دان، هۆلا کۆنفرانسان و مەلەڤانگەها ئۆلۆمپی و چەندێن کۆمەلگەهێن گەشتیاری دێ ل سنۆرێ ناحیا سەرسنکێ هێنە چێکرن.
ئەلند ئەمیر رێڤەبەرێ ناحیا سەرسنکێ بۆ رۆژناما ئەڤرۆ گۆت : ناحیا سەرسنکێ ئێک ژێ ناحییێن قەزا ئامێدیێیە، ناحیەکا گشتیارییە و ل سالا ١٩٥٢ بوویە ناحیە، ژ دو باژێرڤانیا پێک دهێت کۆ ئێک ل سەنتەرێ ناحیێ یە و یا دی ژی ل قەدشێ و ژ ٣٢ گۆندان پێک دهێت کۆ ١٦ ژ وان گۆندان دئاڤاکرینە و یێن دی نە دئاڤا کرینە. سنۆرێ ڤێ ناحیێ ل گۆندێ سیارەتیکا هەتا گۆندێ بوتییا و ئەرەدنێ و ئێنیشکێیە ، و چەندێن جهێن گەشتیاری ب خۆڤە دگریت، وەکۆ سیپەل و شکەڤتا ئێنیشکێ، سیلاڤا ئاشەوا، گەلییێ گەرەگووی، هوتێلا بەری و چەندین جهێن دی یێن گەشتیاری، پێکهاتێن وێ پرانییا وان ژ موسلمان و مەسیحیان پێک دهێت و ب هەڤڕا دژین و کەلتۆرێ پێکڤە ژیانێ ب درێژاهیا دیرۆکێ پاراستییە.
سەبارەت گرنگیدانا حوکمەتا هەرێمێ ب رێک و جادەیێن ڤێ ناحیێ گۆت: د تەمەنێ کابینەیا نەهێ یا حوکمەتا هەرێمێ ب سەرۆکایەتیا مەسرۆر بارزانی چەندێن پرۆژەیێن رێک و جادەیان ل ناڤا سەنتەرێ ناحیێ و سنۆرێ وێ هاتینە جێبجێکرن و کار ل سەر هندەک ژ وان رێکان ژی بەردەوامە، وەکۆ چێکرنا تەڤایا رێک و جادەیێن ناڤا سەنتەرێ ناحیا سەرسنکێ کۆ ٣ ملیار دینار ژلایێ حوکمەتا هەرێمێ ڤە هاتبوونە مەزاختن بۆ چێکرنا رێک و جادە و شوستە و رۆناهییێ و جودا ژێ وێ کۆژمێ ئێک ملیار دینار بۆ رێکێن سنۆرێ باژێرڤانییا قەدشێ هاتبوونە مەزاختێن بۆ چێکرنا رێکێن گۆندێن سنۆرێ وێ باژێرڤانییێ کۆ چێکرنا رێکێن چەندێن گۆندان بوون ل سنۆرێ هەر دو باژێرڤانییان وەکۆ رێکێن گۆندێن ئاشەوا و گوندک و سکرێن و سیداڤا و بوتییا و گۆندێن دی یێن سنۆرێ باژێرڤانییا قەدشێ و دنۆکەدا کار ل سەر هندەک رێکێن ڤان گۆندان هێش بەردەوامە و ل ماوەیەکێ نێزیک دێ رێکێن ڤان گۆندان کەڤنە د خزمەتا وەلاتی و گەشتیاراندا.
ل دۆر پرۆژەیێن نوکە یێن گەشتیاری ل دەڤەرێ ئاشکرا کر: حوکمەتا هەرێمێ هەمی ئاسانکاریان بۆ کەرتێن جودا نەخاسمە گەشتیاری ل دەڤەرێ ئەنجام داینە و د نوکەدا کار ل سەر چێکرنا هوتێلا بەری کۆ پرۆژەیەکێ گرنگ و دیرۆکییە بەردەوامە و ل دو هەیڤێن بهێت دێ کەڤیتە د خزمەتا وەلاتیاندا، و پرۆژێ چێکرنا مەلەڤانگەها ئۆلۆمپی ل ناحیا سەرسنکێ ل قوناغا دیزاینێ بەر ب قوناغا ئاڤاکرنێ چوویە و ل ماوەیەکێ دی یێ کێم دێ دەست ب چێکرنا وێ هێتە کرن و پرۆژێ پارک و سیپەلا وێ دناڤ سەنتەرێ ناحیێ ژی بەر ب تەمام بوونا ڤە دچیت.
سەبارەت پرۆژەیێن هاتی یێن ناحیا سەرسنکێ گۆت: رازەمەندی ل سەر چێکرنا جوتسایدێ رێکا د ناڤبەرا ناحیا سەرسنکێ بۆ دێرەلوکێ و ناحیا شێلادزێ هاتیە دان کۆ چێکرنا ڤێ رێکا گرنگ دێ ب دو قوناغان بیت، جودا ژ وێ دێ هۆلەکا کۆنفرانسان دناڤ سەنتەرێ ناحیێدا هێتە چێکرن و ب چێکرنا ڤێ هۆلێ نەک بتنێ دێ خزمەتا ناحیێ هێتە کرن بەلکۆ دێ مفا بۆ باژێرێ دهۆکێ ب گشتی هەبیت بۆ سازدانا چالاکییان بۆ ڤێ هۆلێ ژبەر بەرفرەهی و جهێ وێ یێ گەشتیاری و دبیاڤێ گەشتیاریدا رازەمەندی بۆ چێکرنا چەندێن کۆمەلگەهێن گەشتیاری هاتیە دان ل سنۆرێ هەر دو باژێرڤانییێن ناحیا سەرسنکێ .
رێڤەبەرێ ناحیا سەرسنکێ زێدەتر گۆت : ب بەردەوامی ب رێکا پلانێن ئەمنی کاری بۆ پاراستنا گیانێ وەلاتی و گەشتیاران دکەن، نەخاسمە ل رۆژێن بێهنڤەدان و رۆژێن ئەهێنی دا و ب رێکێن یاسایی ژی رێگریێ ل هەر زێدەگاڤیەکێ دگرین، چ ب سەر گیانێ وەلاتییان یان پارچە ئەرد و زەڤیاندا بیت و وی کەس و لایەنی ژی ددەنە دادگەهێ یێ ملکەچی بریارێن حوکمەتێ نەبیت یان هەولان بۆ تێکدانا پێکڤەژیانێ ل دەڤەرێ بدەت .
