ب به‌رهه‌ڤبوونا پارێزگاری بنگه‌هێ پشكنینا ترۆمبێلان ل ئاكرێ هاته ڤه‌كرن
ئه‌ڤرۆ:
ب به‌رهه‌ڤبوونا پارێزگارێ دهۆكێ بنگه‌هێ حه‌فتێ یێ پشكنینا ترۆمبێلان ل ناوچه‌داریا گرده‌سین یا سه‌ر ب ده‌ڤه‌رداریا ئاكرێ ڤه هاته ڤه‌كرن.
ژ پێخه‌مه‌ت خزمه‌تكرنا وه‌لاتیێن ده‌ڤه‌رداریێن ئاكرێ و به‌رده‌ڕه‌ش و كێمكرنا هاتنوچوونا خودانێن ترۆمبێلان بۆ سه‌نته‌رێ پارێزگه‌هێ دوهی پشتی نیڤرۆ 7/2/2022 و ب به‌رهه‌ڤبوونا دكتۆر عه‌لی ته‌ته‌ر، پارێزگارێ دهۆكێ و ده‌ڤه‌ردارێن ئاكرێ و به‌رده‌ڕه‌ش و چه‌ندین رێڤه‌به‌رێن فه‌رمانگه‌هێن میری و خه‌لكێ ده‌ڤه‌رێ بنگه‌هێ حه‌فتێ یێ پشكنینا ترۆمبێلان ل ناوچه‌داریا گرده‌سین یا سه‌ر ب ده‌ڤه‌رداریا ئاكرێ ڤه هاته ڤه‌كرن.
پاشتی ڤه‌كرنا وی بنگه‌هی، پارێزگارێ دهۆكێ و كه‌سێن د گه‌ل دا گه‌ڕیانه‌ك د ناڤ بنگه‌هی دا كر و ژ نێزیك سه‌حكره پرۆسا پشكنینا ترۆمبێلێن وه‌لاتیان.
دكتۆر عه‌لی ته‌ته‌ر، پارێزگارێ دهۆكێ د په‌یڤه‌كێ دا گوت: “ئه‌م خوشحالین ب ڤه‌كرنا ڤی بنگه‌هێ پشكنینا ترۆمبێلان ل ناوچه‌داریا گرده‌سین، ئه‌ڤ پرۆژه ب گوژمێ ملیاره‌ك و 850 ملیۆن دیناران هاتیه چێكرن، ئارمانج ژ ڤی پۆژه‌ی ئه‌وه كو پشكنینا ترۆمبێلێن وه‌لاتیان ل هه‌ردو ده‌ڤه‌رداریێن ئاكرێ و به‌رده‌ڕه‌ش و ده‌و‌روبه‌ران بكه‌ت، ئه‌ڤ بنگه‌هه دێ گه‌له‌ك ئاسانكاریان بۆ خودانێن ترۆمبێلان كه‌ت و به‌ری نوكه دڤیا وه‌لاتیان سه‌ره‌دانا كۆمه‌لگه‌ها كواشێ ل دهۆكێ كربا بۆ پشكنینا ترۆمبێلێن خوه، لێ نوكه رێكا وان هاته كورتكرن، هه‌روه‌سا ڤه‌كرنا ڤی بنگه‌هی ل ناوچه‌داریا گرده‌سین دێ ده‌لیڤێن كاری بۆ خه‌لكێ ده‌ڤه‌رێ په‌یداكه‌ت و بزاڤا هاتنوچوونێ ل وێ ناوچه‌داریێ خۆرتتر لێكه‌ت و خزمه‌تا هه‌موو خه‌لكێ ده‌ڤه‌رێ ژی كه‌ت”.
