ب بڕیارا سەرۆك بارزانی هۆلا رەوشەنبیری و مەراسیمان ل بەردەڕەشێ دهێتە بجهئینان
رەمەزان زەكەریا:
سەرپەرشتێ پڕۆژەیێ هۆلا رەوشەنبیری و مەراسیمێن گشتی، ل بەردەڕەشێ ئاشكراكر، هەتا نوكە ب رێژەیا 45% كار د پڕۆژەی دا هاتیە كرن و هەتا شەش مەهێن دی پڕۆژە دێ هێتە تەمامكرن.
ئەندازیار لوقمان عوسمان محەمەد، سەرپەرشتێ چێكرنا هۆلا رەوشەنبیری و مەراسیمێن گشتی ل بەردەڕەشێ بۆ ئەڤرۆ گۆت: «ب بڕیارا سەرۆك بارزانی و ب گوژمێ حەفت ملیار و 348 ملیۆن دیناران ل سەر ئەركێ حكومەتا هەرێما كوردستانێ هۆلەكا مەزن یا هەلكەفتان ل بەردەڕەشێ ل سەر رووبەرێ 40 هزار مەتر دوجار دهێتە چێكرن و كار تێدا بەردەوامە».
ناڤهاتی خویا ژی كر، ئاڤاهیێ هۆلا رەوشەنبیری و مەراسیمێن گشتی ل بەردەڕەشێ ژ سێ پشكان پێكهاتیە و هۆلا مەراسیم و كۆمبوونان ژی 960 كورسیكان بخۆڤە دگریت.
