ب بڕیارەكا شاش باسكێت بۆلا سەنحاریب ژ كۆپا ئیراقێ بێ بەهر بوو
قەیس وەیس:
د داخویانیەكێ دا داود ڕەبەن سەرۆكێ یانەیا سەنحاریب بڕیارێن فدراسیۆنا بەروەخت یا باسكێت بۆلا ئیراقێ ب شاشی دانان پشتی ژ نشكەكێ ڤە قارەمانی ژ باژێرێ كەركووكێ ڤەگۆهاستییە بەغدا و ب ژڤانێ قارەمانیێ ددەمێ خوەدا بۆ دیارنەكر.
زێدەتر ناڤهاتی بۆ ڕۆژنامەیا ئەڤرۆ گۆت: بۆ ماوەیێ زێدەتری مەهەكێ بوو تیما مە بەرهەڤی بۆ كۆپا ئیراقێ یا باسكێت بۆلێ ل سەر ئاستێ كچان دكر كو بڕیار بوو ل باژێرێ كەركووكێ بهێتە كرن، لێ ژ نشكەكێ ڤە ل سەر داخوازا چەند یانەیەكا بێ ئاگەهدارییا مە ڤەگوهاستە باژێرێ بەغدا بێ دانانا ژڤانەكی، هەرچەندە مە داخواز دكر ل ئێك ژ باژێرێن هەرێما كوردستانێ بیت ژبەركو هێزا باسكێت بۆلا كچان چار یانەیێن كوردستانی نە، لێ چو بەرسڤ نەدا، دووڤدا دگەل یانەیەكێ ئەم ڕێكەڤتنی پشكدار نەبیت، مخابن ئەوێ یانەیێ ژی ل ڕێكەڤتنا خوە لێڤەبوو.
هەروەسان ناڤهاتی گۆت: فدراسیۆنا باسكێت بۆلا ئیراقێ یا ڕژد بوو ل سەر بڕیارا خوە یا شاش و ژنشكەكێ ڤە بەری دو رۆژان قارەمانی ڕێكئێخست و بتنێ شەش رۆژ مابوون ئەم ئاگەهداركرین، د دەمەكی دا بوو چەند یاریزانێن مە دگەل هەلبژارتیێ ڤۆلی بۆلا ئیراقێ بوون، هەرچەندە ب نڤێسارەكا فەرمی مە خواستن قارەمانی بۆ 20ێ ڤێ مەهێ بهێتە پاشئێخستن لێ بۆ بەرژوەندییا هندەك یانەیان و نە دڤیان ئەم پشكداربین ڕژدبوون ل سەر بڕیارا خوە یا شاش.
هەروەسان داود رەبەن گوت: یا دروست ئەو بوو بەری دانانا هەر ژڤانەكێ قارەمانییەكێ بۆچوونا دەستەیا گشتی یا فدراسیۆنێ وەرگرتبا ژ وانا یانەیێن وەرزشی نە، ئەڤچەندە ژی نە هاتە كرن، لەوما ژی دێ بێژم غەدر ل یانەیا مە هاتە كرن، مە بەرهەڤیێن باش دكرن لێ ئەوان ددەلیڤەكا كورت دا بێ ئاگەهدارییا مە ژڤانەك ل بەغدا دانا شوونا یا كەركووكێ، بدیتنا من قارەمانی ل كوردستانێ با دا یا سەركەڤتی بیت ژ هەموو لایەكی ڤە.
