ب توندی دێ دژی قانوونا دەزگەهكرنا حەشدا شەعبی راوەستین
پەیڤدارێ وەزارەتا دەرڤەیا ئەمریكا راگەهاند كو وەلاتێ وی ب توندی دژی پڕۆژە قانوونا پێشنیازكرییا ئیراقێ دێ راوەستیت كو ئارمانج ژێ دەزگەهكرنا هێزێن حەشدا شەعبییە، هەروەسا هۆشداری ژی دا كو ئەڤە بەرۆڤاژی ئارمانجێن هەڤپشكێن ئەمنی یێن واشنتۆنە ل گەل بەغدایێ.
تامی بروس، پەیڤدارێ وەزارەتا دەرڤەیا ئەمریكا گوت» ئەمریكا ب توندی دژایەتییا هەر قانوونەكێ دكەت كو نەگونجیت ل گەل ئارمانجێن هاریكاری و هەڤپشكییا ئەمنی یا مە یا دو ئالییانە و بەرۆڤاژی ب هێزكرنا دەزگەهێن ئەمنی یێن نوكە یێن ئیراقێ و سەروەرییا راستەقینەیا ئیراقێ».
پەیڤدارێ وەزارەتا دەرڤەیا ئەمریكا رەخنە ل وێ پڕۆژە قانوونێ گرت و گوت» پێنگاڤەكا گەلەك نەهاریكارە و ئەڤ چەندە فەرمی بوونێ ب وان گرۆپێن چەكداری د بەخشیت كو پەیوەندی ب قەوارە و سەركردەیێن تیرۆرستیڤە هەیە، كو هندەك ژوان بەرژەوەندیێن ئەمریكا كرینە ئارمانج و كارمەندێن ئەمریكی كوشتینە».
پڕۆژە قانوونا ناڤبری كو ل مەها شوباتا بۆری ژ ئالیێ جڤاتا وەزیرێن ئیراقێڤە وەكو رەشنڤیس هاتبوو پەسەندكرن، قانوونا خزمەت و خانەنشینیێ بۆ حەشدا شەعبی بخوەڤە دگریت و بزاڤێ دكەت هێزێن حەشدا شەعبی ل گەل دەزگەهێن ئەمنی یێن دی یێن ئیراقی هەڤشێوە بكەت.
حەشدا شەعبی ل سالا 2014 ل سەر بانگەوازییا ئایەتووللا عەلی سیستانی پشتی پەیدابوونا داعشێ هاتە پێكئینان و پاشی هاتیە تێكهەلكرن ل گەل هێزێن چەكدار یێن فەرمی ل ئیراقێ و هەمان ئیمتیازاتێن لەشكرێ ئاسایی پێ هاتنە بەخشین، بەلێ حەشدا شەعبی هەڤبەندییەكا نێزیك ل گەل ئیرانێ هەیە و بال تێدا هەنە كو د تۆمەتبارن ب ئەنجامدانا هێرشان ل سەر بەرژەوەندیێن ئەمریكا ل ئیراقێ، ب تایبەتی پشتی هێرشا درۆنی یا ئەمریكا ل مەها ئێك ل سالا 2020 كو تێدا قاسم سەلەیمانی ل بەغدایێ كریە ئارمانج.
