ب خێرا میر جه‌لاده‌ت به‌درخان، زمانێ مه ژ ئاخافتنێ بوویه زمانێ نڤیسینێ
كۆنێ ڕه‌ش
ب هه‌لكه‌فتنا 15ی ڤێ تیرمه‌هێ/2021، (70) سال د سه‌ر كۆچكرنا میر جه‌لاده‌ت بدرخان ڕه ده‌رباس دبه، ب من خوه‌شه كو هوون سه‌روه‌ختی ڤان گۆتنێن من ببن: ئه‌رێ میرۆ! ب خێرا سه‌رهلدانا بۆتان گیانێ كوردپه‌روه‌ریێ د هناڤێ باڤ و باپیرێن مه ده هات چاندن.. ئه‌رێ میر جه‌لاده‌ت به‌درخان! ب خێرا كه‌د و وه‌ستا ته، ب خێرا هاوار و ڕۆناهیا ته، بنگه‌هێ ئه‌ده‌ب و وێژه‌یا كوردی یا نووژه‌ن، ب تیپێن لاتینی ل به‌ر مه هات ڤه‌كرن..
به‌لێ، ب خێرا میر به‌درخانێ مه‌زن، كوڕ و نه‌ڤیێن وی، ڕۆژا ئیرۆ ئه‌م خوه پایه‌بلند د ناڤ نه‌ته‌وێن جیهانێ ده دبینن؛ ب سایا میر به‌درخان یه‌كه‌مین سه‌رهلدانا كوردی یا نه‌ته‌وی ده‌ستپێكریه.. ب سایا كوڕێ وی مقداد مه‌دحه‌ت به‌درخان، بنگه‌هێ ڕۆژنامه‌ڤانیا كوردی ژ مه ڕه هاتیه دانین و ب سایا نه‌ڤیێ وی میر جه‌لاده‌ت عالی به‌درخان و هاوارا وی، هیمێ زمانێ مه هاتیه دانین، زمانێ مه بوویه خوه‌دی ئالفابه‌یه‌ك خوه‌سه‌ر.. زمانێ مه ژ ئاخافتنێ بوویه زمانێ نڤیسینێ كو ڕۆژا ئیرۆ پڕانیا كوردان ب ئالفابه‌یا وی دخوینن و دنیڤسینن.
ئه‌رێ، ب خێرا هه‌ردو كۆڤارێن میر جه‌لاده‌ت به‌درخان؛ (هاوار و ڕۆناهی و ستێر و ڕۆژا نوو) یێن برایێ وی د. كامیران به‌درخان نڤیسكار و هه‌لبه‌ستڤانێن به‌ژن بلند د هۆلا ئافراندن و چاندا كوردی ده هاتن خویا كرن، مینا جه‌گه‌رخوین، ئۆسمان سه‌بری، قه‌دری جان، حه‌سه‌ن هشیار..هتد. هه‌م ژی ب وه‌شانا هاوارێ ڕه، هه‌لبه‌ستا كوردی یا نووژه‌ن ب پێنووسا میر جه‌لاده‌ت، د. كامیران و قه‌دری جان و كورته چیرۆكا كوردی یا هونه‌ری ب پێنووسا د. نووره‌ددین زازا سه‌رێ خوه بلندكرن. هه‌كه مرۆڤ ل دیرۆكا مالباتا به‌درخانیان ڤه‌گه‌ره و به‌رپێل بكه، وێ ببینه كو به‌درخانی ب ته‌ڤایی د سرگوون و زیڤاریان ده هاتنه كوشتن و مرن.. ئه‌ڤ یه‌ك دهێله كو ئه‌م ناڤێ وان ب تیپێن زێڕین د دیرۆكا گه‌لێ خوه ده بنڤیسینن.
میر جه‌لاده‌ت یێ كو گۆتیه:
(مله‌تێن بنده‌ست هه‌یینا خوه ژ سه‌رده‌ستێن خوه ب دو تشتان، ب دو قه‌وه‌تا، دو چه‌كان دپارێزن: ئۆل یه‌ك، زمان دودۆ. لێ هه‌كه ئۆلا مله‌تێ سه‌رده‌ست و بنده‌ست یه‌ك ببه، هنگی چه‌ك یه‌ك ب ته‌نێ یه، و به‌ند ته‌نێ زمانه..)
میر جه‌لاده‌ت به‌درخان
