ب درۆنان ئێرشی هێزێن مە ل سووریێ دهێتە کرن
وەزارەتا بەرگریێ یا ئەمریکا راگەهاند، چەند رۆژن ل سووریێ ب درۆنان ئێرشی بنگەهێن وان دهێتە کرن و هەتا نها شەش درۆن ژ ئالیێ هێزێن وان ڤە هاتینە ژناڤبرن و نها هێزێن ئەمریکا د ئامادەباشیێ دانە و دێ ب توندی بەرسڤا هەر ئێرشەکێ دەن.
وەزارەتا بەرگریێ یا ئەمریکا راگەهاند، چەند رۆژن ل سووریێ ب درۆنان ئێرشی بنگەهێن وان یێن سەربازی دهێتە کرن و د چەند رۆژێن بۆری دا هێزێن وان شیاینە شەش درۆنان ژناڤ ببەن و نها ژی هەموو بنگەهێن سەربازی یێن ئەمریکا د ئامادەباشیێ دانە و دێ بەرسڤا هەر ئێرشەکێ ژی دەن.
ل ئالیێ دی دو رۆژن فرۆکێن نەنیاس ل چەندین دەڤەرێن سووریێ ب تایبەتی ژی ل نێزیکێ دێرازۆرێ ئێرشی هێزێن سەر ب ئیرانێ دکەن و بەری دو شەڤان چەندین جاران ئێرشی هێزێن چەکدارێن سەر ب ئیرانێ هاتیە کرن و د ئەنجاما ئێرشێن چەندین رۆژێن بۆری دا ب دەهان چەکدارێن سەر ب ئیرانێ هاتینە کوشتن و گەلەک بنگەهێن وان یێن سەربازی ژی هاتینە ژناڤبرن.
ل ئالیێ دی فەرماندارەکێ هێزێن سووریا دیموکرات ژی راگەهاند، چەند رۆژن رەوش ب گشتی ل باکورێ سووریێ ب تایبەتی ژی ئەو دەڤەرێن کو هێزێن ئەمریکا لێ هەنە ئالۆزە، ب درۆنان ئێرشی بنگەهێن سەربازی یێن ئەمریکا دهێتە کرن و هێزێن ئەمریکا ژی شیاینە ب تەکنولوجیا پێشکەفتی درۆنان ژناڤ ببەن، ل هەمبەر دا هێزێن ئەمریکا ژی ئێرشی هێزێن سەر ب ئیرانێ ل دێرازۆرێ و دەڤەرێن دی یێن سووریێ دکەن، ژ بەر ڤێ یەکێ ژی نها رەوش ئالۆزە و وەکو هێزێن سووریا دیموکرات مە نەڤێت رەوش ئالۆز ببیت، چونکی ئالۆزیەکا نوو ل دەڤەرێ د بەرژەوەندیا ئەمریکا یان ژی سووریێ دا نینە، بەلکو تنێ د بەرژەوەندیا هێزێن تیرۆرست دایە، داعش و هێزێن دی یێن تیرۆرستی دڤێت جارەکا دی رەوش ئالۆز بیت دا ئەو بشێن دەست ب کریارێن تیرۆرستی ل دەڤەرێن جودا جودا یێن سووریێ بکەن.
هەمان فەرمانداری ئەو یەک ژی دیار کریە، ئۆپەراسیۆنێن وان ل دژی داعشێ ب هەڤکاریا ئەمریکا بەردەوام دکەن، چونکی چەکدارێن رێکخستنا تیرۆرستی یا داعشێ بەردەوام دخوازن کریارێن تیرۆرستی ئەنجام بدەن، ژ بەر ڤێ یەکێ ژی ئەو ل گەل ئەمریکا بەردەوام کار دکەن دا نەهێلن داعش دەست ب کریارێن تیرۆرستی بکەت.
چاڤدێرێن سیاسی ژی دیار دکەن، هەکە شەڕەکێ نوو د ناڤبەرا حزبوللا لوبنانێ و ئسرائیلێ دا دەستپێ بکەت ئەو یەک دێ کاریگەریا خوە ل سووریێ ژی کەت، چونکی ئیرانێ دڤێت ب رێیا هێزێن چەکدارێن ل سووریێ، ئیراقێ و لوبنانێ شەڕێ ئسرائیلێ بکەت و د رەوشا نها دا ئیرانێ نەڤێت ب رەنگەکێ راستەوخوە ل دژی ئسرائیلێ چو بزاڤان بکەت، ژ بەر ڤێ یەکێ ژی دهێتە چاڤەرێکرن کو ئالۆزیێن نوو ل سووریێ ژی روو بدەن.
