ب درۆنەكا بۆمبرێژكری هێرشی كێلگەها سەرسنگ یا پترۆلێ هاتە كرن
ئامێدیێ، مەحمود نهێلی:
درۆنەكا بۆمبڕێژكری دوهی سپێدێ 15/7/2025 هێرشی سەر كێلگەهێن نەفتێ یێن سەرسنگ ل ناوچەدارییا چەمانكێ یا سەر ب دەڤەردارییا ئامێدیێ ڤە كر، زێدەباری راوەستاندنا بەرهەمئینانا نەفتێ زیانێن ماددی ژی گەهاندنێ.
ل دۆر ڤێ یەكێ وەزارەتا سامانێن سروشتی راگەهاند، دوهی سپێدێ ب درۆنەكا بۆمبرێژكری هێرشەكا تیرۆرستی ل سەر كێلگەها سەرسنگ ل سنۆرێ چەمانكێ هاتییەكرن، هێرشێ چو زیانێن گیانی نەبوون.
ئاشكرا ژی كر كو بەری دو شەڤان ژی ب درۆنان هێرشی كێلگەها خۆرمەلە ل هەولێرێ هاتییەكرن، ڤان هێرشان بۆ سەر ژێرخانەیا ئابۆری یا هەرێما كوردستانێ ب توندی شەرمزاردكەین.
سەرۆكایەتییا هەرێما كوردستانێ، هێرشێن ل سەر ژێرخان و ناوچەیێن جودا جودا یێن كوردستانێ شەرمزار كرن و دیار كر، د ڤان رۆژان دا كێلگەهێن پەترۆلێ ل ناوچەیێن خۆرمەلە و سەرسنگ بووینە ئارمانج و راگەهاند، دڤێت حكومەتا ئیراقێ رێكاران بگریتە بەر و هێرشبەران ژی دیار بكەت.
سەرۆكایەتییا هەرێمێ ئاشكرا ژی كر، هێرش سەقامگیری و سەروەرییا ئیراقێ تێك ددەن و وەبەرهێنانا بیانی ژی دئێخنە بەر مەترسییێ.
بالیۆزخانەیا ئەمریكا ژی ل بەغدا ئەڤ هێرشێن ل سەر كێلگەهێن پەترۆلێ ل خۆرمەلە و سەرسنگ شەرمزاركرن و تەكەز كر، دڤێت حكومەتا ئیراقێ رێ ل هێرشان بگریت و سەروەرییا خۆ ب پارێزیت، ژ بەركو هێرش دێ زیانێ ب كۆمپانی و وەبەرهێنانا بیانی ل دەڤەرێ گەهینن، لەو داخوازێ ژ حكومەتا عیراقێ دكەین ڤەكۆلینان بكەت و ئەنجادەرێن ڤان هێرشان دیار بكەت و رێكارێن یاسایی ل هەمبەر بهێنە وەرگرتن.
