ب دو یاریزانان تایكواندۆیا گارە رێزێن ئێكێ و سێیێ ب دەستڤە ئینان
د داخویانیەكێ دا سەرۆكێ یانەیا گارە یا وەرزشی دیار كر ب پشكداریا دو یاریزانان ل سەر ئاستێ كوڕان شیان رێزێن ئێكێ و سێیێ د قارەمانیا تایكۆاندۆیا ئیراقێ بۆ كێشێن جودا ب دەستڤە بینن و یاریزانەك ژی بۆ هەلبژارتیێ ئیراقێ هاتە گازیكرن، د هەڤڕكیێن واندا ئەوا ل سەر ئاستێ لاوان ل باژێرێ بەغدا هاتیە كرن.
زێدەتر شێروان بەشار گۆت: ب سەرپەرشتیا راهێنەر یونس عەبدوللا یاریزان دلناس یونس بۆ كێشا 48 كگم شیا ناسناڤێ قارەمانیا ئیراقێ ب دەستڤە بینت و ب فەرمی بۆ ناڤ رێزێن هەلبژارتیێ ئیراقێ بهێتە ژێگرتن، ژلایێ خوەڤە زێوەر موشیر بۆ كێشا 58 كگم رێزا سێیێ ب دەستڤە ئینا وەكو ئێك ژ باشترین یاریزانێن قارەمانیێ ژی هاتبوو دیاركرن، هەرچەندە ب بتنێ دو یاریزانان مە پشكداری كر لێ شیان ئاست و ئەنجامەكێ باش و ژ هەژی د پشكداریا خوە یا ئێكێ دا ب ناڤێ یانەیا گارە ب دەستڤە بینن، ئەڤ یاریزانە دگەل چەند یاریزانێن دی دێ بەردەوام دووڤچوون و پشتەڤانیا وان هێتە كرن ئەوا د شیانێن مە دا بیت دێ بۆ بەرهەڤ كەین ژبەركو ئەم دێ بەردەوام پشت بەستنێ ل سەر كوڕێن باژێرێ خوە كەین.
هەروەسان ناڤهاتی گۆت: یانەیا گارە هەر دەم بزاڤێ دكەت ل دووڤ شیانێن خوە یێن دارایی هەر پشكداریەكا هەبیت ل سەر ئاستێ ئیراقێ و كوردستانێ باشترین شێوە بەرهەڤیان بكەت و خوە ژ چو چالاكییان دوور نائێخیت لێ هەكە شیانێن دارایی بەردەست بن، ئەم رژدین بەردەوام پشتەڤانیا گەنجێن وەرزشڤان یێن باژێرێ خوە بكەین و ب هیڤییا وێ یەكێ لایەنێن پەیوەندیدار ژی پشتەڤانێن مە بن ژبۆ پێشئێخستنا وەرزشا پارێزگەها دهۆكێ.
