ب دو یاریێن ئاگرین دهۆك و زاخۆ دێ پەردێ ژ سەر خولا ئیراقێ راكەن
بۆ جارا ئێكێ د دیرۆكا تەپا پێی یا ئیراقێ دا بڕیارە وەرزێ ئەڤ سالە یێ خولێ ب ناڤێ خولا ستێرێن ئیراقێ ب شێوەكێ جودا بهێتە ئەنجامدان ئەوا ل دووڤ پرۆتۆكۆلا فیدراسیۆنا تەپا پێی یا ئیراقێ دگەل دەستەكا خولا لالیگایا ئسپانی رێكەفتن هاتییە كرن ل دووڤ ستاندەرێن فیفایێ و رێپێدانا ئاسایی سەرپەرشتیێ بكەت ئەوا دهێـتە چاڤەڕێكرن بۆ جارا ئێكێ سیستەمێ ڤارێ د هەمی یارییان دا بهێتە بكارئینان.
بۆ وەرزێ 2023-2024 بڕیارە 20 یانە پشكداریێ تێدا بكەن و یاریێن وان ب شێوەیی خول دو قۆناغ دێ هێنە بڕێڤەبرن ئەوا بڕیارە سوبەهی پێنچ شەمبی دەست ب كاروانێ خولێ بهێتە كرن ب ئەنجامدانا چار یارییان ئەو ژی، نەورۆز- زەورا، ئەمانە بەغدا- ئەلقاسم، حدوود نەفت ئەلبەسرا، نەجەف- نەفت میسان.
دهۆك بەرانبەر هەلگرا ناسناڤی یە
رۆژا ئەینییا بهێت دەمژمێر 9:30 شەڤ تیما یانەیا دهۆك دێ ئێكەم پێنگاڤا خوە دناڤ ئەرد و جەماوەرێ خوە دا هاڤێژیت دەمێ مێڤاندارییا یانەیا شورتە هەلگرا ناسناڤێ وەرزێ بۆری دكەت، دهۆكێ سێ سەركەفتن بەرانبەر 10 سەركەفتن بۆ شورتە و شەش وەكهەڤی هاتینە، دووماهی یارییا شورتە دناڤ ئەردێ دهۆكێ دا ب گۆلەكێ وەكهەڤی هاتبوون دهۆك، بۆ یارییا ئەڤرۆ دبیت جوداهییەكا مەزن پەیدا بیت ژلایێ ئاستی و شێوازێ برێڤەبرنێ تایبەت هەبوونا سیستەمێ ڤارێ، ل دووڤ داخویانیێن بۆ رۆژنامەیا ئەڤرۆ راهێنەر و كارگێرییا یانەیا دهۆك گەشبینن تیما وان بۆ ڤێ یاریێ ئاستەكێ باش نیشان بدەت و هیڤیا سەركەفتنا ئێكێ و بكەنە دیاری بۆ جەماوەرێ خوە.
زاخۆ بەرانبەر ئاستەنگا جەوییە
د یارییەكا دی یا ئاگرین دا ل دەمژمێر حەفتی شەڤ بڕیارە تیما یانەیا زاخۆ ل یاریگەها نێڤدەولەتی دناڤ ئەرد و جەماوەرێ خوە مێڤاندارییا یانەیا جەوییە بكەت ئێك ژ یاریێن بهێز یێن گەڕا ئێكێ یا خولێ دا، تیما بەغدایی ل وەرزێ بۆری خودانا رێزا دویێ بوو، ئەڤ سالە ل دووڤ راپۆرتێن رۆژنامەڤانی بەرهەڤیێن باش كرینە، لێ یانەیا زاخۆ پشتی یێ قەتەر تەلال ئەلبلۆش كرییە راهێنەرێ تیما خوە نێزیكی 60% ژ پێكهاتیێ تیمێ گوهارتیە و گەشبینە و پشتگەرمییا جەماوەرێ خوە سەركەفتنا ئێكێ دەست ب خولا ستێرێن ئیراقێ بكەت، د وەرزێ بۆری دا تیما زاخۆ نەشیابوو سەركەفتنێ ل سەر جەوییە بینت، دیرۆكا یاریێن هەردو یانەیان دا زاخۆ شەش سەركەفتن بەرانبەر 14 خوسارەتیان و پێنچ وەكهەڤی ئیناینە.
هەولێر چاڤ ل سەركەفتنا ئێكێ یە
ژلایێ خوەڤە تیما یانەیا هەولێر دێ پێنگاڤا ئێكێ دناڤ یاریگەها خوە شەهید فرانسۆ حەریری هاڤێژت و یارییا خوە بەرانبەرنەفت یا بەغدایی ل دەمژمێر 9:30 شەڤ ئەنجامدەت، ل دووڤ بەرهەڤیێن هەردو تیما هەولێر شیاییە بەرهەڤیێن باش بكەت ب ئینانا كۆمەكا باش یا یاریزانان وچوونا كەمپەكی بۆ توركیا، دیدارێن هەردوكا بڤی رەنگی بوون، 13 سەركەفتن بۆ هەولێرێ و سێ بۆ نەفتێ بەرانبەر نەهـ وەكهەڤییان، ژ یاریێن دی یێن رۆژا ئەینی، كەربەلا- نەفت ئەلوەسەت، مینا- كارەبا، رۆژا شەمبی تەلەبە و كەرخ.
