ب دەستڤەئینانا پلێتا دەربازبوونێ گەشبینی بۆ نفشێ نوو پەیدا كر
د داخویانیەكێ دا راهێنەرێ تیما باسكێت بۆلا یانەیا دهۆك كەیفخوەشحالییا خوە دیار كر پشتی تیما وی ل سەر ئاستێ تازەپێگەهشتییان شیاین ل سەر ئاستێ ڤاڤارتنێن پارێزگەهێ و كۆما ئێكێ یا هەرێما كوردستانێ سێ سەركەفتنا ل دووڤ ئێك بینت و ببنە قارەمانێن كۆما خوە و دەربازبیتە یاریێن دووماهییا قارەمانییا ئیراقێ و ئەڤ پێنگاڤە ب درێژە پێدانا پلانا خوە و كارگێریێ ب دانانا نڤشەكێ نوو و ڤەگەڕاندا هێزا یانەیێ.
زێدەتر میقداد رەعدی گۆت: هەرچەندە سەركەفتن و دەربازبوون بۆ یاریێن دووماهییا قارەمانییا ئیراقێ یا گرنگە، لێ گرنگتر ئەوە كو ئەڤە بۆ سالەك و شەش هەیڤە ئەم كار ل سەر دكەین ڤەگەڕاندنا ناڤ و هێزا باسكێت بۆلا یانەیا دهۆك ب ڕێیا درۆستكرنا نڤشەكێ نوو ژ كوڕێن باژێرێ خوە و ئەڤ دەربازبوونە وەكو بەلگە و گەشبینی بوو مە پەیدا كرییە ئەو پلانا مە دانایی یا سەركەفتی یە، لەوما ئەم لەزێ ژی د چو بڕیاران دا ناكەین بۆ قارەمانییا بهێت نە بتنێ پشكداربین بەلكۆ دێ هەمی بزاڤان كەین مفایی ژێ وەربگرین و بۆ هەر یاریەكێ ژبلی سەركەفتنێ چو بژاردەیێن دی نە دانین، ژبەركو مە تیمەكا تازەپێگەهشتییان یا هەیی كو هێشتا ل بن راهێنانێن چەستەیی و فێركرنا ئەكادیمی و زانستی نە و ئەڤ نڤشە نە بتنێ بۆ ڤان قارەمانییان بیت، بەلكو ببنە پاشەرۆژا باسكێت بۆلا دهۆكێ و رێژەییا نێزیكی 50 یاریزانان پرۆژەیەكێ بچووك نینە، لەوما ب پشتەڤانییا بەردەوام یا كارگێرییا یانەیێ گەشبینن دێ پلانا مە جهێ خوە گریت و یا سەركەفتی بیت.
ناڤهاتی ئەوچەندە ژی نە ڤەشارت هەتا نوكە ئەوی ب خوەبەخشی و رۆژانە هەتا پێنچ دەمژمێران ژ وەختێ خوە بۆ راهێنانان د بۆرینین پێخەمەت پێشكەفتنا وەرزش و دانانا تیمەكا ئەكادیمی و بەرهەڤ و گۆت: هەر كەسەكێ تیما مە دیتی ب وژدانانە كەیفخوەش بوویە، لێ گەشبینم بۆ پاشەرۆژەكا نێزیكتر ل سەر ئاستێ كوردستانێ و ئیراقێ ب یاریزانێن خودان شیان بۆ ئاستێن جودا بینن پێنەڤێت ئەڤچەندە ژی ب كارەكێ كۆم و پشتەڤانییا كارگێرییا یانەیێ ئەوا بەردەوامە بۆ پێشكەفتنا وەرزشا یانەیێ.
