ب دەستڤە ئینانا دێربییا پارێزگەهێ سێمێلێ هیڤیێن خوە گەشكرن
قەیس وەیس:
تیما تەپا پێی یا یانەیا سێمێل هیڤیێن خوە بۆ هەڤڕكیێن دەستڤە ئینانا پلێتا دەربازبوون بەر ب پلا نایاب گەشتر لێكرن پشتی شیا سەركەفتنەكا گرنگ ل سەر مێڤاندارا خوە یانەیا تەناهی بینت ب دو گۆلا بێ بەرانبەر د یارییا واندا ئەوا ل ئەینییا بۆری ل یاریگەها زانكۆ ژ چارچووڤەیێ هەڤڕكیێن گەڕا حەفتێ یا خولا پلا ئێكا كوردستانێ هاتییە كرن.
ژ ئەنجامێن دی یێن د خولێ دا، رزگاری2 -چنە كۆیە، رواندۆز چنە- 2 پیشەسازی، خاك 5-1 هەلۆ، سلێمانی 1-2 بابان، بازیان چنە- خانەقین، هەلەبجەیا شەهید چنە -3 قەلادز، چەمچەمال 2-2 شۆرجە.
بڤان ئەنجامان تیما یانەیا سێمێل پێشڤە هاتە رێزا پێنجێ ب16 خالان كێمتر سێ خالان ژ خودانا سەرێ لیستێ یانەیا رزگاری ئەوا ب 19 خالان رێزا ئێكێ دهێت،ب هەمان خالان كۆیە رێزا دویێ دهێت، هەردو یانەیێن قەلادز و پیشەسازی ب 18 خالان رێزێن سێیێ و چارێ دهێن، سلێمانی ب13 خالان رێزا شەشێ، شۆرجە و هەلۆ ب 10 خالان رێزێن حەفت و هەشتێ دهێت یانەیا تەناهی پاشڤەچوو رێزا نەهێ ب نەهـ خالان.
ل دۆر ڤێ یاریێ پەروەر حسێن سەرپەشتێ تیما یانەیا سێمێل بۆ رۆژنامەیا ئەڤرۆ گۆت: ل دووڤ پلانا مە دانایی ب ئۆمێدین بەردەوامیێ بدەینە سەركەفتنا پێخەمەت ب گەهینە ئەوێ ئارمانجا مە دڤێت ئەو ژی دەسڤەئینانا پلێتا دەربازبوونێ، پشتی ئەو گوهۆڕینێن ڤێ دووماهیێ بۆ قۆناغا دویێ هاتینە كرن، تا رادەیەكێ باش ئاستێ تیمێ بەر ب باشتر چوویە، پشت گەرمییا مە ب پشتەڤانییا د. عەلی تەتەر پارێزگارێ دهۆكێ یە ئەوێ سۆز دایە مە كو بەردەوام پشتەڤانیێ بكەت و سۆپاسییا قائیممەقامێ قەزا سێمێلێ كو هەردەم پالپشت و پشتەڤانە بۆ مە.
