ب دەھان وەبەرھێنەرێن کوردستانێ موفلس بووینە
ئه‌ڤرۆ نيوز:
ل گۆرەی داتایێن دەستەیا وەبەرھێنانا ھەرێما کوردستانێ، د ماوەیێ نەە سالێن بۆری ب کۆژمێ ٤١ ملیار دۆلاران وەبەرھێنان ل کوردستانێ ھاتیە کرن و ژ ڤی کۆژمی ب تنێ ١٢% ب بەر دھۆکێ دکەڤیت کو نێزیکی پێنچ ملیار و ٥٩ ملیۆن دۆلارانە و رێژا ھەرە مەزن یا وەبەرھێنانێ ل پارێزگەھا ھەولێرێ ھاتیە کرن. سەرۆکێ ئێکەتیا وەبەرھێنەرێن کوردستانێ ژی راگەھاند، ئاستێ وەبەرھێنانێ ٨٠% دابەزیە.
ل پەی وان داتایان، ژ سالا ٢٠٠٦ کو نوو دەست ب وەبەرھێنانێ ھاتبوو کرن و ھەتا ئەڤ سالە، ب کۆژمێ ٤١ ملیار و ٥٩ ملیۆن دۆلاران وەبەرھێنان ل ھەرێما کوردستانێ ھاتیە کرن و ژ ڤی سەرجەمی ب کۆژمێ ٢٤ ملیار دۆلاران وەبەرھێنان ل ھەولێرێ ھاتیە کرن کو ب رێژا ٥٧% بوو و ل پارێزگەھا سلێمانیێ ب کۆژمێ ١٢ ملیار دۆلاران ب رێژا ٣٠% و ل دھۆکێ ب کۆژمێ پێنچ ملیار و ٥٩ ملیۆن دولار ب رێژا ١٢%. ھەر د وان ئاماران دا ھاتیە کو ل دەمێ دیارکری دا ٧٢٢ مۆلەتێن وەبەرھێنانێ بۆ پرۆژان ھاتینە دان، ٣٣١ ل ھەولێری، ل دھۆکێ ١٩٤ و ل سلێمانیێ ١٩٧ مۆلەت بۆ پرۆژێن وەبەرھێنانێ ھاتینە دان.
ئەحمەد رێکانی، سەرۆکێ ئێکەتیا وەبەرھێنەرێن کوردستانێ بۆ ئەڤرۆ دیار کر، باردۆخێ نھا گەلەک لاواز بوویە و پارە نەمایە د بانکان دا و کرین و فرۆتن و بازرگانی ژی ب رێژەکا مەترسیدار کێمبوویە، ئەڤە ژی بوویە ئەگەر ب رێژا ٨٠% وەبەرھێنان بەر ب کێمبوونێ بچیت و ب ملیارەھا دۆلاران زیان ب ھەرێما کوردستانێ کەفتینە و گۆت ژی: ھاتنا وەبەرھێنەرێن بیانی یێن نوو بۆ ھەرێما کوردستانێ راوەستیایە، چونکو بەری نھا سالانە ١٠ ملیار دۆلار بۆ وەبەرھێنانێ دچوو، بەلێ نھا ناگەھیتە ملیارەکێ ژی.
ناڤبری ئاماژە دا وێ چەندێ، نێزیکی ٤٥٠ وەبەرھێنەران ل ھەرێما کوردستانێ ھەنە و ڤان وەبەرھێنەران نێزیکی ٤٠ ملیار دۆلاران پرۆژە خستینە کاری، بەلێ ژ بەر باردوخێ نھا ١٠% تووشی کێشێن دارابی یێن مەزن بووینە و ژمارەکا مەزن ژ وەبەرھێنەران موفلس بووینە. گۆت ژی: پشتی ڤان قەیرانان ئابوورێ کوردستانێ پێدڤی ب چاڤخشاندنەکێ ھەیە و دڤێت کۆنفرانسێن نێڤدەولەتی بھێنە سازدان.
خویاژی کر، ھەکە ١٠ ملیار دۆلار ژ لایێ حوکمەت و بانکان ڤە بکەڤنە د ناڤ بازاری دا، پتریا کێشە و ئاریشێن ئابووری دێ ھێنە چارەسەرکرن، چونکو کارتێکرنەکا مەزن ل سەر ئابووری ھەیە و گۆت ژی: نھا ژ بەر شەرێ داعش، بانکێن نێڤدەولەتی قەرا نادەنە وەبەرھێنەرێن ھەرێما کوردستانێ. ھەروەسا دیار کر کو تشتەکێ بێگومانە ھەکە کوردستان نەفتا خوە ب سەربەخۆیی بفرۆشیت، دێ کارتێکرنەکا گەلەک باش و ئەرێنی کەتە سەر کەرتێ وەبەرھێنانێ.
