ب رێكا كەڤالان پەیامێن مرۆڤاتیێ دگەهینم
دلڤین رەشید
شێوەكار (سیدرا سلێمان) د دیدارەكێ دا بۆ رۆژناما ئەڤرۆ دیاركر كو ئەو خەلكا كۆمەلگەها گوهبەلە سەر ب قەزا شنگالێ ڤە و پشتی سالا 2014 ئەو دەمێ كو مرۆڤایەتی ل شنگالێ تووشی مەزنترین كارەسات بووی، ئەوێ رێكا هونەری هەلبژارت وەكو ئامرازەك كو دەربڕینێ ژ ئێش و ئازارێن ناخێ وێ دا هەین بكەت.
هەروەسا گۆت : دناڤ جەرگێن ئازارێن قەزا شنگالێ دا و پشتی روودانێن سالا 2014 گەلەك گەنجێن ئێزدیان شیان ژ ناڤ ڕەژیا خەمان بەرب تیرۆژكێن رۆناهیێ ڤە بچن و هەر ئێك ژ وان ل دووف شیانێن خۆ بەرب بەهرەیێن جودا ڤە چوون، ئەز ژی وەكو كچەكا خەلكا شنگالێ من شێوەكاری هەلبژارت و بومە خودان بەهرەیەك و ئەڤێ بەهرەیێ د ناخێ من دا گەشەكر ژ بۆ هندێ كو ئەز بەردەوام بم و بشێم ب رێكا چێكرنا كەڤالان پەیامێن مرۆڤایەتی پێشكێشی جیهانی بكەم و پەیاما من ئەوە ژ بۆ جیهانێ بدەمە دیاركرن كو پشتی ئەو نە هامەتیا ب سەرێ مللەتێ مە دا هاتی و ب تایبەت ژی كچ و ژنان كو هێشتا ئەم خودان هێزەكا مەزن و خۆڕاگرین و دێ هەر خۆ راگڕ مینین.
