ب رێژەیا 40% پارەیێ بۆ چێكرنا جادەیێن گوندان هاتیە تەرخانكرن
لەزگین جوقی
قایمقامێ قەزا باتیفا دیاركر، پشتی باتیفا بوویە قەزا سەر ب ئیدارا سەربەخۆیا زاخۆ ڤە حوكمەتا هەرێما كوردستانێ گەلەك گرنگیی دایە باتیفا، لەورا ژی كار یێ دهێتە كرن باتیفا گەلەك ب باشی بهێتە گوهۆرین ژ سیمایێ ناحیێ بۆ قەزایێ و ب كوژمێ 38 ملیار دیناران پرۆژە ل باتیفا هاتینە بجهئینان».
مەحمود خەلیل، قایمقامێ قەزا باتیفا راگەهاند، هندەك پرۆژە كەفتینە د خزمەتا وەلاتیان دا و هندەك پرۆژە ل ژێر بجهئینانێ نە، ژ وان پرۆژان ژی جووتسایدێ قەزا باتیفا ب درێژاهیا دوو كیلۆمەتران و دناڤ سەنتەرێ قەزا باتیفا دا جووت ساید هاتیە چێكرن و نەخۆشخانەكا هەڤچەرخ ل باتیفا د وارێ بجهئینانێ دایە و د كەرتێ پەروەردی دا ژی قوتابخانە دهێنە ئاڤاكرن و نووژەنكرن و ئاریشا ئاڤا ڤەخوارنێ ژی هاتیە چارەسەركرن دگەل چارەسەركرنا ئاریشا كارەبێ هەموو گۆند و دەڤەرین سەر ب باتیفا ڤە ب رێژا 40% پارەیێ بۆ چێكرنا جادەین گوندان هاتیە تەرخانكرن و گەلەك گرنگی ب چێكرنا جادەیان دهێتە دان».
قایمقامێ قەزا باتیفا ئاشكەرا كر، كارەب گەهشتیە 48 گوندان ڤان گوندان كارەب هەبوو، لێ هندەك ئاریشە تیدا بوون هەموو ئاریشا هاتینە چارەسەركرن ل سنۆری باتیفا و هندەك گوند هەنە ل سالا 1988 دەمێ ئەنفالان هاتینە خرابكرن و هەتا نوكە نەهاتینە ئاڤاكرن، گەلەك گوند هەنە خەلكی كارۆبارین خۆ دناڤدا ئەنجام ددەن و ئاژەلی ب خودان دكەن و كارێن چاندنێ لێ دكەن، لێ گوند نە دئاڤاكرینە، ئەو ژی هەتا 18 گوندان و خەلك رۆژانە قەستا سەر گوندین خۆ دكەن.
زێدەتر گۆت: «د وارێ وەبەرهینانێ دا هەتا نوكە كەرتی گەشت و گوزارێ دا پرۆژە دهێنە بجهئینان ل باتیفا ئەڤە پرۆژە بۆ پشڤەبرنا كەرتی گەشت و گوزاری ل باتیفا د گرنگن مە داخواز كریە پرۆژەیێن وەبەرهینانێ ل باتیفا بهێنە بجهئینان، هەروەسا ژی كار هێتە كرن پتر پرۆژەیێن چاندنێ بهێنە چێكرن».
مەحمود خەلیل خۆیا كر: «هەموو هەولدان دهێنە كرن بۆ پتر پشتەڤانیا كەرتێ گەشت و گوزارا باتیفا، ل سالا بۆری گەلەك كۆمپانیان سەرەدانا باتیفا كرینە و ئەم كاردكەین باتیفا وەكو دەڤەرەكا گەشتیاری ل ئیدارا سەربەخۆیا زاخۆ بهێتە ناسكرن و بەردەوام پرۆژەیێن خزمەتگوزاری دگەهنە جهێن گەشتیاری، ب تایبەتی ژی د واری كارەبێ و چێكرنا جادەیێن جهێن گەشتیاری دا».
قایمقامێ قەزا باتیفا تەكەز كر:» ئەڤ سالە پلانەكا باش هاتیە دانان بۆ پتر خزمەتكرنا خەلكێ باتیفا، هەموو پرۆژەیێن گرێدایی ژین و ژیارا وەلاتیان دێ هێنە بجهئینان و پتر پرۆژەیێن ئاڤێ و كارەبێ و جادەیان دهێنە چێكرن و دناڤبەرا باتیفا بۆ زاخۆ هەموو دێ بیتە جووتساید».
