ب رێیا پارچە ڤیدیۆیان سەرنجا گەشتیاران رادكێشیت
دلڤین رەشید:
وێنەگر (ئیبراهیم كەنعان) د دیدارەكێ دا بۆ رۆژناما ئەڤرۆ دیاركر كو ئەو خەلكێ باژێرێ كەركووكێ یە و دەرچۆیێ كولیژێ یە پشكا ئەندەزیاریا ژمێریار ، نوكە وەكو گەنجەك زێدەتر كارێ ریكلامان دكەت و پارچە ڤیدیۆیا ل سەر وان جهێن گەشتیاری و جوان یێن ل عراقێ ب گشتی و هەرێما كوردستانێ ب تایبەتی وێنەدكەت و د سۆشیال مەدیایێ دا بەلاڤ دكەت و ئارمانجا وی یا سەرەكی ژی راكێشانا گەشتیارانە بۆ دەڤەرێن گەشتیاری.
هەروەسا گۆت: ل سالا 2020 هزرا دیاركرنا جهێن شینواری و رەوشەنبیری و گەشتیاری ژبۆ من هات كو ب شێوازێ كورتە ڤیدیۆیان وێنە بكەم و دسۆشیال مەیدیایێ بەلاڤ كەم، دا كو سیمایێ جوانیا وەلاتێ خوە نیشا كەسانێن بیانی بدەم، ئەڤ چەندە ژی هەموو ب خوەبەخشانە دكەم، چونكی ئێك ژ حەزێن منە، بەلێ دگەل دا ئەز وەكو گەنجەك كارێن ریكلامان ژی دكەم لەورا ئەز دشێم داهاتیەكی ب دەست خوەڤە بینم داكو بشێم بەردەوام بم ل سەر وێ ئارمانجا من هەی.
