ب رێیا پرۆژێن وه‌به‌رهێنانێ ده‌لیڤێن كاری بۆ وه‌لاتیان دهێنه دابینكرن
هه‌ولێر، قائید میرۆ:
بڕیاره هژماره‌كا پڕۆژێن ستراتیژی یێن كه‌رتێ وه‌به‌رهێنانێ بهێنه بجهئینان و جێگرێ سه‌رۆكێ ئێكه‌تیا وه‌به‌رهێنه‌رێن كوردستانێ ژی ئاشكرا كر، ب ئه‌نجامدانا وان پڕۆژان ده‌لیڤێن كاری بۆ وه‌لاتیێن هه‌رێما كوردستانێ دێ په‌یدابن.
كه‌مال ئه‌حمه‌د، جێگرێ سه‌رۆكێ ئێكه‌تیا وه‌به‌رهێنه‌رێن كوردستانێ بۆ رۆژناما ئه‌ڤرۆ دیار كر، ل هه‌رێماكوردستانێ 700 پڕۆژێن وه‌به‌رهێنانێ هاتینه په‌سه‌ندكرن و ژ وان ژی 131 پڕۆژه‌یان مۆهله‌ت وه‌رگرتیه ب بهایێ هه‌شت ملیار دۆلاران كو هه‌موو كه‌رتان بخوه‌ڤه دگرن و گۆت: “ل گوره‌ی سیاسه‌تا حوكمه‌تا هه‌رێما كوردستانێ زێده‌تر گرنگی ب پڕۆژێن ستراتیژی دهێته دان، ئه‌وێن دبنه ئه‌گه‌رێ زێده‌بوونا داهات و بهێزكرنا ژێرخانا ئابووریا هه‌رێما كوردستانێ، ئه‌ڤه ژی جهێ دلخۆشیا مه‌یه كه‌رتێ وه‌به‌رهێنانێ گه‌شێ بكه‌ت”.
كه‌مال ئه‌حمه‌د گۆتژی: “هژماره‌كا زۆرا ده‌لیڤێن كاری دێ هێنه دابینكرن و به‌ری نوكه ژی 50 هزار ده‌لیڤێن كاری ب رێیا پڕۆژێن وه‌به‌رهێنانێ هاتینه په‌یداكرن، بێگومان خه‌لكه‌كێ زۆر ژێ مفاداربوویه و بووینه خودان كار، ژ به‌ركو دامه‌زراندن ژی هاتیه راگرتن زێده‌تر خه‌لكی نوكه پێدڤی ب ده‌لیڤا كاری هه‌یه، هه‌موو بزاڤه‌ك دهێته كرن ئه‌و پڕۆژه بهێنه بجهئینان یێن پێدڤیا ئه‌ڤرۆ یا هه‌رێما كوردستانێ بن”.
