ب سایا كه‌ڤالێن پیكاسۆى گوندێ وان بوویه ئێك ژ مه‌زنترین جهێن گه‌شتیارى
ئه‌ڤرۆ نیوز ، زنار تۆڤى:
هۆنه‌رمه‌ندێ شێوه‌كار پابلۆ رویز پیكاسۆ، ل 25 ئوكتۆبه‌را 1881 ل باژێرێ مالاگا ل ئیسپانیا ژ دایك بوویه، ل سالا 1973 ل وه‌لاتێ فره‌نسا وه‌غه‌ر كریه، ئێكه ژ ناڤدارترین شێوه‌كارێن جیهانى.
ل سالا 1944 پیكاسۆى، نیاسینى ل گه‌ل ئاریاسێ سه‌رتراش دا ل فره‌نسا په‌یدا كر، دۆستایه‌تیه‌كا ب هێز دناڤبه‌را وان دروست دبیت، هه‌تا مرنا پیكاسۆى به‌رده‌وام دبیت، ئه‌و سه‌رتراشه هه‌ڤشێوێ پیكاسۆى ب ره‌گه‌ز ئیسپانى بوویه و ل فره‌نسا دژیا، هه‌ر جاره‌كا وى سه‌رێ پێكاسۆى چێكربا پاره ژێ وه‌رنه‌دگرتن، ل هه‌مبه‌رى ڤێ چه‌ندێ پیكاسۆى وه‌كو دیارى هژماره‌كا كه‌ڤالێن خوه بۆ وى دكرنه دیارى، ب وى ره‌نگى وى سه‌رتراشى نێزیكى 60 كه‌ڤالێن پێكاسۆى كۆم كرن، پشتى مرنا پیكاسۆى، پرانیا مۆزه‌خانێن مه‌زن یێن جیهانى، ب ملیۆنان دۆلار خستنه به‌ر ده‌ستێ وى سه‌رتراشى، داكو وان كه‌ڤالان بفرۆشیته وان، به‌لێ وى ئه‌و هه‌موو ده‌ستكه‌فتێن مه‌زن یێن مادى ره‌دكرن و ئه‌و كه‌ڤاله نه‌فرۆتن.
ئاریاسێ سه‌رتراش، هه‌موو ئه‌و كه‌ڤالێن ب بها یێن كو هه‌ڤالێ وى پێشكێشى وى كرین، كرنه دیارى بۆ گوندێ خوه ل ئیسپانیا، ب ڤى ره‌نگى قوربانى ب ملیۆنان دۆلاران دا، وى ئه‌ڤ چه‌نده كر، داكو ناڤێ گوندێ خوه بلند بكه‌ت و بكه‌ته ناڤه‌نده‌كا گرنگ بۆ هه‌موو عاشقێن پیكاسۆى، مۆزه‌خانه‌ك بۆ كه‌ڤالێن پێكاسۆى چێكر، ژ ئه‌نجامێ وێ مۆزه‌خانێ گوندێ وان بوویه ناڤه‌نده‌كا ئابوورى یا مه‌زن، ئه‌و كه‌ڤاله بوونه ده‌ستكه‌فته‌كێ ئابوورى یێ مه‌زن بۆ هه‌موو خه‌لكێ گوندى، چونكى ژ ئه‌نجامێ وان كه‌ڤالان سالانه رێژه‌كا مه‌زن یا گه‌شتیاران ژ هه‌موو جیهانێ سه‌ره‌دانا وێ مۆزه‌خانێ دكه‌ن.
ئاریاسێ سه‌رتراش ل سالا 2008 وه‌غه‌ركریه، ژ ئالیێ خه‌لكێ گوندێ وى و ئیسپانیا ڤه، وه‌كو قاره‌مانه‌كێ مه‌زن د رێورسمه‌كێ دا هاته ڤه‌شارتن، هه‌تا نوكه ئه‌و مۆزه‌خانه یاكو ل سالا 1985 ب ناڤێ مۆزه‌خانا سه‌رتراشێ پیكاسۆى هاتیه ب ناڤكرن، سالانه پێشوازیێ ل مێهڤانان دكه‌ت، ئه‌و گوندێ بچووك ژ ئه‌گه‌رێ ئاریاسێ سه‌رتراشن بوویه ئێك ژ گرنگترین جهێن گه‌شتیارى یێن ئیسپانیا، ئه‌و سه‌رتراشه بوویه ناڤدارترین و پاقژترین سه‌رتراش ل جیهانێ.
